Aruba a conoce su di 11 morto den trafico pa 2024 dialuna anochi

ORANJESTAD – Aruba dialuna anochi a conoce su di 11 morto den trafico pa 2024. Tabata pa 7:30 di awenochi Central di Polis a haya un melding cu un accidente pisa a sosode riba e caminda principal di Pos Chiquito na altura di e rotonde. Central di Polis a dirigi Polis y ambulance cu maximo urgencia na e sitio di incidente. Na yegada di e prome unidad a mira un hende homber benta riba caminda cu no ta duna signaal di bida.

CONSTATA MORTO

Ambulance a haci lo maximo pero lamentabelmente no por a haci nada mas. Dr. Voskuil ta constata e fayecido di un hende homber. Na momento cu e defunto wordo reconoci oficialmente lo publica su identidad. Ta trata un caso serio di Hit and Run na unda un chauffeur lo mester a dal e cabayero aki y bandona e sitio. Tambe dos otro vehiculo tambe ta envolvi den e caso lamentabel aki. Polis di trafico bou guia di e specialistanan di trafico, altocomisario di Polis, slachtofferhulp, Polis forensico como tambe dokter forensico ta na e sitio y e investigacion ta den pleno desaroyo. Nos ta haci un apelacion na e chauffeur di Hit and Run pa presenta na un di e warda di polis. Bo a mira kico a pasa bo por keda anonimo y duna bo informacion ariba nos tipline 11141, nos ta garantisa bo ta keda anonimo. Cuerpo Policial Aruba ta manda un palabra di condolencia y forsa na e famia di e fayecido den e momento dificilnan aki.