Proyecto Green Corridor sostene pa mayoria den parlamento

ORANJESTAD – E reunion di parlamento riba Green Corridor, a termina mei anochi dialuna manece diamars, cu aprobacion di parti di fraccion di AVP pa e proyecto. 'Cu 12 voto na fabor y 5 contra, parlamento a sostene e proyecto y gobierno a haya su carta pa cu e aprobacion aki" vice presidente di parlamento Chris Dammers a confirma na NoticiaCla.com awe mainta. Fraccion di MEP a vota contra, y no ta conoci kico fraccion di Democracia Real a vota. Minister Benny Sevinger (responsabel pa e proyecto) a sigura prensa dialuna mainta, cu e intencion no tabata pa pidi placa extra, sino pa duna splicacion atrobe riba e progreso di e proyecto.

NO MAS PLACA

Segun e mandatario, e la sigura cu, -contrario na pensamento di oposicion-, e no ta pidiendo mas placa, pasobra ‘si e proyecto resulta cu mester di mas placa, mi lo bin parlamento pa pidi pa mas placa’. E la mustra cu ta un desinformacion total tin y cu MEP ta purbando di crea descordia sin base. A splica un biaha mas cu e proyecto ta uno cu ta viable y cu ta cla pa wordo ehecuta. E placa cu ta wordo menciona, ta e suma di 292 miyon cu na 2010 caba a wordo aproba. “E proyecto no a bira mas caro. Mi no ta bin pidi placa extra. Como tal no mester cambia ningun ley” Sevinger a sigui bisa. Como tal tambe, como cu no mester cambia ley, no mester di un conseho di Raad van Advies. E departamentonan di gobierno mes a duna conseho cu tur loke ta sosodiendo ta legal y corecto.

SUMA APROBA

E la mustra cu como minister, e no por dicidi riba su mes pa ‘djis pasa e suma aproba’ pa e proyecto. “Laga esey ta bon cla. Autorisacion cu nos a haya di parlamento, esey nos ta cumpli cun’e. Ni mas, ni menos. Si mester tin problema den future cu nos mester bay parlamento, nos lo tin cu bay parlamento” Sevinger a sigura prensa. A sigura tambe cu e proyecto ta dura entre 2 pa 2 aña y mey. A mustra cu tur e mal informacion lo a keda aclarea den e reunion di merdia.

REACCION MEP

Fraccion di MEP no a keda contento cu e resultado di e reunion y a tilde AVP y e gobierno na mando, di a ‘hipoteca nos yiunan y nan yiunan pa paga 18 aña 16.2 miyon florin contra tur conseho financier’. Segun lider di fraccion di MEP, Evelyn Wever Croes, pa 10 ora largo dialuna, e la pidi pa nan si haya e consehonan, pero cu nan no a ricibi nan. “Mi tin berguensa di e parlamento aki. Mi punto ta, si minister Sevinger no ta worry cu e ta hipoteca nos yiunan y nan yiunan, si minister Sevinger no ta worry cu e ta manda Aruba mas den bancarota, nos no por cambia esey”, Wever Croes a finalisa bisando. Segun Wever, dictadura a drenta parlamento y ‘gobierno tin hopi cos di sconde den ‘green corridor’. NOTA: foto di minister Sevinger durante conferencia semanal di prensa dialuna.