Cantante Elton John (77) ta casi ciego despues di un infeccion di wowo

LONDON - E cantante Britanico Elton John a perde mayoria di su bista. E strea mundial di 77 aña a bisa esaki ayera nochi den e estreno na London di e musical The Devil Wears Prada, pa cual el a scirbi e musica.

John a sufri un infeccion di wowo zomer ultimo i no por a mira for di su wowo drechi for di e tempu ei. Debi cu e cantante tambe tin problema cu su wowo robes, e no por lesa ni wak nada mas, el a bisa den un talk show Mericano siman pasa.

Su problemanan di wowo tambe ta strob’e como musico, John a bisa. Pero “tin speransa cu cosnan lo bai bon.”

Riba esenario na e musikal ayera nochi, John a bisa ku e no por a mira e presentashon. “Pero mi ta gusta skucha. I mucha homber, el a zona bon awe nochi,” el a bisa. Tambe el a gradici su casa David Furnish pa tur e sosten.