Illis: OM no por a proba culpabilidad di estafa di Oduber di ‘ambtenaarnan spirito’ den caso Flamingo

ORANJESTAD – Ministerio Publico no por a prueba cu ex minister Otmar Oduber tabata culpable di e.o. estafa den loke ta e asunto di e asina yama ambtenaarnan spirito. Esaki tabata parti di e defensa diabierna di e dos abogadonan Illis y Carlo, den e caso penal Flamingo. E parti aki ta trata e caso di e ambtenaarnan spirito, L Phillips, R Thiel y H Geerman. Segun abogadonan, OM (Ministerio Publico) tabata ‘selecta cuidadosamente’ ken pa persigui (cherry-picking). “No por saca otro conclusion cu Oduber a haci nada incorecto cu aceptacion di e tres ‘spookambtenaar” manera cu nan a wordo yama,  e abogadonan a bisa, usando entre otro testimonio di director di DHR (Direccion di Recurso Humano di gobierno) sra O. Lares cu, segun e abogadonan, a descarta cualkier iregularidad cu e empleo di e tres personanan aki. 

SPLICACION DI PROCESO

Segun e abogadonan, ta bisto cu Ministerio Publico no a compronde e aspecto di nombracion politico den oficina di e minister. Algo cu ta diferente ora cu bo nombra un ambtenaar. “Un minister ta tuma un hende di confiansa. Si bo ta di acuerdo of no, no ta relevante, pa balota e legalidad. E funcionan aki ta wordo cambia constantemente” e abogado a sigui bisa. Unico regla cu mester tin, ta cu e funcion mester wordo aproba pa Conseho di Minister, y mester tin un presupuesto aproba pa por paga e trahadonan en cuestion. Nada mas. Y segun e abogadonan, tur tres persona, a cumpli cu e proceso aki. E trahadonan aki no tin beneficio secundario, y nan ta raporta directamente na e minister. E contractonan no ta conforme LMA (Ley normal di ambtenaar) y por wordo disolve hopi facil. Tur ta puntonan cu a splica huez, pa e compronde e esensia di e trabou di e tres personanan en cuestion y con diferente e ta ora cu ta emplea un ambtenaar vs un persona den oficina di minister. 

SKIP E PROCESO DI SOLICITUD

Unda cu OM ta haya cu esaki ta un problema segun e abogadonan, ta cu e forma cu e tres personanan aki a wordo tuma na trabou, nan tipo di trabou y e control pa nan prestacion. Y mirando cu e trahadonan a cumpli cu tur cos menciona, mester rechasa e ponencia di OM pa cu e personanan aki y e cargo contra e minister pa a estafa pais Aruba door di emplea nan incorectamente. Ademas OM no por a demonstra cu e trahadonan tabata ‘incapaz’ pa haci nan trabou. 

A TRAHA OF NOTambe e abogadonan a haci e pregunta central, si e trahadonan a traha realmente e trabou pa cual nan a wordo emplea. Aki a cuestiona e testimonio cu OM a usa, cu ta solamente di parti di ex minister Tromp, esta un declaracion cu no por a wordo substancia. Segun e defensa, OM no a haci su investigacion corecto pa prueba loke nan ta acusa e tres personanan y e minister di a haci. E abogadonan a usa como prueba, varios articulo di corant, emails y hasta den corte a pasa un video di un conferencia di prensa unda cu prome minister Wever-Croes ta confirma cu e tabatin un di e personanan aki,. H Geerman como un di su trahadonan. 

KORTE LIJN

Abogadonan a trata finalmente e parti cu nan ta yama ‘korte lijn’, cu ta basicamente splica e relacion cu un ciudadano por tin cu un minister na Aruba, compara cu Hulanda. E sistema y e cultura na Aruba ta di tal forma cu facilmente un ciudadano tin aceso na un minister, y esey ‘no ta algo ilegal’. Na final a pidi huez pues pa absolve nan cliente di e cargonan y tambe pa declara OM no admissible. “E no a haya placa, tereno, material a cambio di fabor. Nada nada”. Y si e mester haya un castigo, pa esaki ta tempo ya sirbi. Dialuna OM por reacciona riba e defensa di e abogadonan.