Boekhoudt: Famia di Mitch no kier violencia sino trankilidad

DEN HAAG – E demonstracion di dialuna anochi no tabatin mag di sali asina for di man, y e disturbionan ta wordo desaproba. Asina e minister plenipotenciario di Aruba na Hulanda, Alfonso Boekhoudt ta reacciona un dia despues serca omroepwest.nl. E ta referi na e demonstracion na honor di e arubiano Mitch Henriquez, cu apenas un dia prome a wordo declara morto a consecuencia di aggression policial. Mientrastanto e ruman muher di Mitch, Lila Henriquez a yega Hulanda awe. "Mi ta kibra. Mi ta emocionalmente kibra" e la bisa ora cu e la baha for di avion na Schiphol. 

YAMADA

“Nos ta haci un yamada. No obstante e tristesa pa Mitch, por fabor keda trankil” Boekhoudt a bisa. E ta haci e yamada den cuadro di e demonstacion na e warda di polis di heemstraat. Durante e demonstracion ey, un total di 16 persona a keda deteni. “E famia no kier esey. Nan no ta sostene violencia. Ta netamente e violencia cu a haci nan dolor” Boekhoudt a bisa. E sa, pasobra e tin contacto cu e famia.

TRISTESA

Segun Boekhoudt, un parti di e famia ta bin di Hulanda, y e (Arubahuis) ta haci tur cos pa yuda nan den nan tristesa.”Nan ta purba di deal cu e tristesa y tur esaki ta bin aserca awor”. Prome cu saca conclusion, e mandatario kier pa warda e investigacion termina prome.

MISA

Mientrastanto na Aruba, e mama y otro famia di Mitch Henriquez a tene un misa dialuna anochi na Noord, y despues a uni serca un potret grandi di Mitch, y a ricibi bishitantenan cu a bin mustra nan sosten na e famia cu e perdida di nan yiu. 

Foto : Marielle Bakker