Wever-Croes: Pensioen di biehes ta aumenta 1 jan 2025

ORANJESTAD - Den su discurso nacional di diahuebs anochi, Prome Minister Evelyn Wever-Croes a anuncia entre otro cu entrante 1 di januari 2025, e pensioen di biehes ta bolbe subi cu 2.4%. Pensionadonan lo cobra esaki fin di otro luna caba. Den total e pensioen cu nos grandinan ta ricibi a subi cu mas di 400 florin den e ultimo 7 añanan. Esaki lo sigui subi den e añanan nos dilanti, na forma responsabel.

“Gabinete Wever-Croes a traha duro pa crea un espacio financiero despues di tur reto di e ultimo añanan. Y awo ta e momento pa nos duna bek na esnan cu a contribui asina hopi na crecemento di Aruba. E aumento di pensioen ta solamente un ehempel di con nos ta inverti den futuro di nos ciudadanonan. Nos ta comprometi pa garantisa cu nos grandinan, cu a construi e pais aki, por goza di nan biehes cu dignidad y felicidad. Esaki ta apenas e comienso, y nos lo sigui duna na nos pensionadonan y inverti den futuro di Aruba, den un manera responsabel", Prome Minister a expresa.