A descubri ruta di cocaina ‘bou di laman’ entre Colombia i Australia

BOGOTA - Autoridadnan Colombiano, den colaboracion cu otro paisnan, a confisca un cantidad record di cocaina den e ultimo seis simannan. Seis ‘narco-submarino’ tambe a wordo intercepta na caminda pa Australia cu ton di cocaina.

E ta wordo considera e exito mas grandi di ‘Operacion Orion’, den cual Colombia ta colabora cu 61 otro pais. E partnernan ey a provee avionnan, helicopternan y barconan, pero mas importante ta cu nan tambe a comparti informacion, e capitan Manuel Rodríguez, hefe di e brigada anti narcotico di Marina Colombiano, a bisa e corant Britanico The Guardian.

Den seis siman, mas di 400 sospechoso a wordo deteni y 225 ton di cocaina a wordo confisca. Esei ta kasi 10 porshento di e produkshon anual mundial kalkulá. “Esaki ta pone un buraku den e komersio di kokaina,” Rodríguez ta bisa. “Esaki lo salba miles di morto di overdosis i lo kosta e kartelnan mas ku $8 biyon.” Tambe a tuma den beslag 1.000 ton di marihuana.