Oduber: Loke O.M. a presenta contra dje den caso Flamingo, ta solamente nan suposicion

Posted on 11/26/2024 3:10 pm AST | Updated on 11/26/2024 3:12 pm AST

ORANJESTAD – Tur loke a wordo presenta contra su persona dialuna den tratamento di caso penal Flamingo, ta suposicion y conclusion di Ministerio Publico. Asina e sospechoso principal di e caso, ex minister Otmar Oduber a bisa diamars merdia durante un conferencia di prensa riba e caso. Diabierna awor, e ekipo di abogado di e ex minister lo demonstra den corte cu tur e acusacionan contra nan cliente, ta sin base. Esaki ta e plan di accion segun Oduber mes a declara diamars mainta e conferencia di prensa, dunando asina su prome reaccion despues cu un dia prome e la tende fiscal exigi un castigo incondicional di prizon di 3 aña contra dje.

PERSECUCION PA TA AMIGO

Segun Oduber, mientras cu mayoria acusacion contra dje a cay, a keda solamente un of dos acusacion basa riba algun whatsapp entre persona cu ta comenta riba su ayudo na nan, y e hecho cu e conoce un amigo cu a haya un tereno, y otronan cu e conoce pasobra nan a vota pa su partido POR den pasado. “Si e politico conoce un hende y a cota pa POR, esey ta motibo pa persigui un politico” Oduber a comenta, como e modus operandi di Ministerio Publico. “Topa un hende cu tin problema, cu bo ta bay yuda, no tin nada robez, si bo no bay en contra di ley pa bo beneficia e persona” Oduber a sigui bisa. “Un persona cu Otmar ta conoce, ta e motibo cu ta persigui Otmar pasobra e ta un conoci”. Segun Ministerio Publico, pasobra den su caso, esta Oduber a coregi un fayo di DIP, e ta wordo colga. Ademas, segun Oduber, no tin ningun hende cu a acus’e pa soborno riba tereno.

DECLARACION DI TESTIGONAN

Finalmente, Oduber a mustra cu mientras cu OM mes no a interoga e directornan di e respectivo departamentonan cu e tempo ey tabata resorta bou di dje, su ekipo di defensa a exigi y a logra pa por scucha por lo menos 27 di e 31 cu nan a pidi, incluyendo e directornan menciona di e respectivo departamentonan. Diabierna mainta 8’or y mei, e ekipo di defensa di Oduber, ta prome gescheduled pa presenta e defensa di nan cliente.

Huez ta dicta sentencia caso Flamingo na januari di 2025
ORANJESTAD - “Some are equal but some are more equal than others”, ta e forma con Ministerio Publico dialuna mainta a cuminsa nan argumento (repliek) riba e defensa di e sospechosonan den e caso Flamingo. E fiscal en cuestion a sigui insisti cu no mester considera e acto di OM como persecusion pasobra no tabatin presion politico y ‘e loke ta haciendo, no ta politicamente motiva’. Ademas a sigui insisti cu no obstante e defensa, OM ta para ariba cu tabatin trato preferencial. Ademas, cu no tabatin un maneho publica di e excepcionan pa e asina yama young profesionals. Aki tabata sigui faborece cierto personanan.
Mas Corte
Lesa Mas
Oduber: Mi a warda 5 aña, y mi ta warda 6 siman mas pa un sentencia den mi caso
ORANJESTAD – Otmar Oduber no tin problema pa warda 6 siman mas pa un sentencia den e caso penal Flamingo. Asina e la bisa Noticiacla dialuna atardi durante un conferencia di prensa riba e tema. Awe mainta laat, huez a suspende e caso y anuncia cu pa dia 22 di januari 2025 e lo dicta sentencia den e caso aki. Oduber a spera cu e sentencia lo a cay mas prome, den december, pero e no tin problema cu e tin cu warda algun siman mas.
Mas Corte
Lesa Mas
Carlo: Huez mester absolve Otmar Oduber di tur cargo den caso Flamingo
ORANJESTAD – Huez mester declara Ministerio Publico no admissible den e caso aki, of absolve ex minister Otmar Oduber di tur cargo den e caso penal Flamingo. Y si esey no por, y si mester impone un castigo, pa Oduber wordo sentencia na e castigo cu e la sinta caba den ‘voorarrest’, pues cu e no mester sinta ningun castigo mas. Asina e abogadonan di Oduber a bringa diabierna pa gran parti di e dia pa nan cliente. Tabata prome chens despues di 5 aña y 3 luna cu e defensa a haya oportunidad pa mustra e banda di Oduber, for di 2019 cu e caso a ‘haya bida’.
Mas Corte
Lesa Mas
Illis: OM no por a proba culpabilidad di estafa di Oduber di ‘ambtenaarnan spirito’ den caso Flamingo
ORANJESTAD – Ministerio Publico no por a prueba cu ex minister Otmar Oduber tabata culpable di e.o. estafa den loke ta e asunto di e asina yama ambtenaarnan spirito. Esaki tabata parti di e defensa diabierna di e dos abogadonan Illis y Carlo, den e caso penal Flamingo. E parti aki ta trata e caso di e ambtenaarnan spirito, L Phillips, R Thiel y H Geerman. Segun abogadonan, OM (Ministerio Publico) tabata ‘selecta cuidadosamente’ ken pa persigui (cherry-picking). “No por saca otro conclusion cu Oduber a haci nada incorecto cu aceptacion di e tres ‘spookambtenaar” manera cu nan a wordo yama, e abogadonan a bisa, usando entre otro testimonio di director di DHR (Direccion di Recurso Humano di gobierno) sra O. Lares cu, segun e abogadonan, a descarta cualkier iregularidad cu e empleo di e tres personanan aki.
Mas Corte
Lesa Mas
RMR a nombra Jane Jansen como Vice Presidente di Corte Comun pa Aruba
DEN HAAG – Rijks Ministerraad (RMR) diabierna a nombra pa Corte Conhunto di Husticia ta a 2 hues, 2 vice-presidente di e sucursalnan na Aruba y Sint Maarten, 2 miembro suplente y 1 miembro militar. Sr. E.A. (Erik) Lensink i Sr. P.M. (Pim) Leijten ta wordo nombra hues. Como vice presidente di e filial di Aruba, Sra. D.J. (Jane) Jansen a nombra. Sr. J.R. (Joost) Veerman ta wordo nombra como vice presidente di e filial di Sint Maarten. Sr. P.J. lo bira miembro suplente. (Peter) Duinkerken y Sr. D.M. (Diederik) Thierry a nombra. Como miembro militar di e multiple camber militar, Comandante M.P. (Martin) Luttge a nombra. Konseho di Minister di Reino a aprobá e postulashonnan pa nombramentu riba proposishon di Sekretario di Estado Struycken (Protekshon Hurídiko).
Mas Corte
Lesa Mas
OM: Tendencia di ministernan acusa, ta pa culpa OM di persecucion politico
ORANJESTAD – Ex minister Otmar Oduber a tende fiscal exigi un castigo di 3 aña di prizon incondicional contra dje, na fin di e rekisitorio dialuna atardi. Fiscal a cuminsa e rekisitorio, remarcando cu esaki no ta e prome caso di corupcion contra un minister of ex minister. Ademas, a usa e momento pa sigura tur hende cu OM no ta trata un caso asina pa Sali como e ganador, sino un caso asina ta un perdida pa Aruba. Tambe a purba mustra cu contrario na pensamento den comunidad, no ta importa si e persona ta un minister of no. Y mas importante aun, esaki no ta un ‘asunto politico’, sino un caso cu ta trata un politico. Dos cos diferente.
Mas Corte
Lesa Mas