Parlamentario Jacintha Constancia bek den libertad

WILLEMSTAD – Despues di a permanece un siman sera den prison, acusa di e.o. falsificacion di firma, ex minister Jacintha Constancia a bandona prison y por a bay cas atrobe. E ta keda sospechoso te ora cu caso bin dilanti si. Lider di partido cu Constancia ta actualmente parlamentario, Gerrit Schotte, a compaña Constancia y hunto cu famia di e ex minister, a pasa algun momento agradabel na cas na Boca Sami.

E DETENCION

Parlamentario Jacintha Constancia a wordo deteni,  despues cu e la presenta na warda di polis na Rio Canario pa un ‘combersacion’. Cargonan  pa cual e ex minister y actual parlamentario ta deteni, a bira conoci despues. E cargonan ta inclui fraude, malversacion, labamento di placa, y falsificacion di document. E ta trata e caso ‘Dubnium’, unda cu den pasado caba algun persona a cay sera ‘brevemente’, incluyendo e caso di Constancia. 

MONDKAPJES

Constancia ta wordo cuestiona pa e asunto di e asina yama compra di ‘mondkapjes’, pero cual producto nunca no a yega su destino. Tabata durante e periodo di gobernacion Schotte, cu lo a haci un pedido di 365.000 mil florin na ‘mascara facial’ o sea mondkapje serca e fundacion Bureau Ziektekosten Voorziening. E placa lo a wordo paga, pero nunca no a mira e mondkapjes. Esey a pone cu a dicidi di haci un investigacion cu a conduci na un serie di detencion, y entrada hudicial, incluyendo cas di Constancia mes, su mama y su casa (ex).

PARTIDO 

Constancia ta e di tres persona di e partido cu ta wordo sospecha di ta involucra den actonan contra ley. Esaki ta inclui propio lider di e partido Gerrit Schotte (cu ta presenta dilanti mesa berde na September den caso Babel), y e propio presidente di partido Thode, cu ta wordo culpa di a illegalmente graba combersacionan den parlamento