Eman: Ta confirma cu Aruba tin su candidato pa CAFT caba!

ORANJESTAD – Gobierno di Aruba a haya un persona pa represent’e den e commission di supervision local, conoci como CAFT (College Aruba Financieel Toezicht). Prome minister Mike Eman a confirma asina e noticia di NoticiaCla.com di un tempo atras, pero no tabata dispuesto pa duna e nomber di e persona. “E la wordo aproba pa conseho di minister (di Aruba)mientrastanto tambe” Eman a bisa. Mes momento sinembargo e la splica tambe cu e nomber tin cu bay pa conseho di minister di Reino. “Di momento cu e haya e aprobacion total ey, nos ta divulga tambe ken e persona ta” Eman a sigura nos.

KEN E PERSONA TA

E persona cu gobierno a haya dispuesto pa haci e trabou aki, tin un trayectoria largo. “E ta un professional. E tin un sosten hopi amplio hopi hopi grandi den nos comunidad”. Ni riba insistencia di NoticiaCla.com, Eman no kier a confirma si ta un persona cu inicial RC y cu e fam ta termina cu e fam Croes. “Nos no por specula of duna nomber na e momento aki” Eman a finalisa bisando. E la bisa solamente cu e persona a acepta, y ta considere ‘un honor pa por sirbi pais Aruba den un funccion importante asina’.

KIBRA RECES PA (C) LAFT

Mes momento, e proceso pa e ley mes pa formalisa CAFT, tabata den discussion. Ta siman pasa ainda NoticiaCla.com a raporta cu parlamento di Aruba ta bay kibra reces pa logra pasa e ley pa supervision financiero, conoci como LAFT (Landsverordening Aruba Financieel Toezicht). Vice presidente di parlamento Chris Dammers a confirma na NoticiaCla.com dialuna, cu esey ta necesario pa ‘interumpi’ e reces y logra pasa e ley prome cu 1 di augustus proximo, y asina evita problema cu Hulanda. Mientrastanto otro siman , ta inicia un periodo ocupa pa parlamento unda cu tin cu pasa por lo menos dos ley den e mesun siman, esta e ley di Green Corridor y BAZV.

RECES NA PELIGER

Cu e informacion aki, Dammers ta confirma e informacion anterior di NoticiaCla.com, cu e reces di parlamento ta na peliger. Den e caso aki, Dammers ta mustra cu e reces lo cuminsa normal si, pero asina cu e ley ta cla pa drenta parlamento, lo interumpi esaki. E ora e lo percura pa yama suficiente hende (parlamentario) bek pa garantisa cu tin quorum. Den caso di AVP, esaki mester ta un total di 11 persona, di e 13. Ademas Dammers a confirma mesora tambe cu e mes lo ta esun cu lo presidi tur e reunionan di awor te ora cu reces tuma lugar y caba, pasobra e president mes, esta Marisol Lopez Tromp lo ta for di Aruba por lo menos te fin di luna di july ainda, pa motibonan personal. Lopez ta den exterior for di comienso di siman pasa. 

LAFT

Segun Dammers, e ley di LAFT ta canando su caminda ainda, y no a drenta parlamento. Mirando cu pa 6 di jul, parlamento lo cuminsa su reces, esaki lo wordo ‘kibra’ despues di tal forma cu tin suficiente hende, (quorum di 11) pa e ley por pasa. Segun Dammers, no ta cuestion cu e ley no ta bay pasa. E ta sigur cu e ley ta pasa, pasobra ‘ta un compromiso entre dos pais, Hulanda y Aruba’, pues cu lo haci tur posibel pa e pasa prome cu 1 di augustus. Asina e ta cumpli cu e protocol. Manera cu NoticiaCla.com a raporta, si Aruba no cumpli cu e fecha, e lo por haye cu un Algemene Maatregel van Rijks Bestuur, cu ta nifica cu Hulanda lo encarga su mes cu maneho di Aruba su finansa publico. Y for di informacion fidedigno, e maatregel lo ta riba mesa asina cu e fecha yega y vence.