Caso Flamingo: Oduber ta desmenti cu a yuda hende cu trabou a cambio di voto

ORANJESTAD – Tratamendo di e caso penal Flamingo a continua diabierna mainta tempran, cu e parti cu ministerio publico a yama caso Esser, cu ta referi na un di e sospechosonan di e caso esta sra A. Esser. Ademas, huez a dicidi cu ta bay trata e caso di otro sospechoso Thiel, dia 21 di januari 2025, ya cu aworaki e no ta na Aruba sino na Merca. E ora huez a ordena pa trece Thiel for di Merca pa su tratamento.

CASO ESSER

Huez a cuminsa na puntra Esser riba e trabou cu e tabata haci pa Otmar Oduber tempo e tabata minister entre 2017 y 2019. Segun Esser, e tabata na disposicion di Oduber, y mester a fungi como un ‘buffer’ entre e publico y Oduber. Durante e proceso, a compronde cu Esser tabata pone su cosnan den computer. Huez a confronta Esser riba un pida informacion cu ta trata un lista di nomber ,y unda cu ta mustra cu kier a puntra ex minister Andin Bikker pa yuda ‘nos’. Huez a puntra Esser pakico ta papia di ‘nos’, riba cual Esser a responde cu esaki ta un forma di papia na Aruba, unda cu ta referi semper na ‘nos’. Tambe huez a remarca cu riba otro papel ta blo menciona Otmar Oduber. Segun Esser, esey tabata pasobra tur hende cu ta bin pa Oduber. Huez a puntra Oduber riba esaki y e ex minister a splica cu enberdad tur hende kier papia cu ne, y cu ta pesey e tin Esser, cu ta atende cu nan, sin cu nan mester acudi na Oduber. Ademas Oduber a sigura cu e no ta tuma decision. Ademas Oduber a pidi huez pa e wak e documentonan original, y no esnan traduci na Hulandes pasobra hopi cos por ‘perde’ den e traduccion, y por interpreta algo otro cu no ta. Tambe huez a puntra Oduber si e ta tabata trata persona su di su partido so, pero Oduber a sigure cu e ta trata tur hende, pero no tabata tuma ningun decision riba tereno, pasobra tur cos tabata wordo dicidi den reunionan na DIP. 

HENDE BENEFICIAAki huez a mustra Oduber cu tin nomber di personanan cu ta mencion cu lo a wordo beneficia. A menciona entre otro e persona Richard vM, cu a wordo interoga pa Huez COmisario. E lo a busca trabou cerca Odubr, cu a mande pa haci un solicitud na BID. Ademas e tabata haci ‘follow up’ cu e hedenan pa asina nan sa con nan ta para cu nan peticionan. Esey ademas, tambe tabata trabou di Esser. Ora cu huez a confronta Oduber cu un solicitud di trabou di vM, dirigi na Oduber, Oduber a sigura e huez cu esey tabata algo normal. Despues a mustra un carta cu vM a manda pa Oduber, pa gradicie cu e la haya un trabou, y cu Oduber por conta cu su voto. Huez a puntra Oduber e ora si ta asina e tabata gana voto. Oduber a desmenti esaki na huez. E tabata yuda masha hopi hende, pero, esey no kier men cu nan tin cu vota pe. E ta parti di cultura di Aruba unda cu ta yuda hende. 

YUDA VITO C.

Huez tambe a menciona e nomber di otro sospechoso den e caso aki, Vito C, cu segun Esser e tabatin hopi bon relacion cu ne y su famia. C, tabata den espera di un tereno cu a lo a keda pega for di 2015 y Esser a splica cu e la mustra C, kico pa haci pa e tereno ey. Huez a mustra Esser di su relacion special cu C, unda cu C a paga estudio (school) di Esser. Esser a splica huez cu e la divorcia y debi na e situacion, C , a opta pa yuda Esser. Un otro persona cu su nomber a cay, tabata di Natascha. R, unda cu aki Esser a bisa cu e persona aki desde 2013 tabata traha cu Oduber. Ora cu a menciona mas nomber, Esser a splica cu ta hendenan cu tabata bin pa yuda cu nan carta di solicitud pa trabou na Serlimar, pero cu nunca e la duna hende trabou.

WHATASPP

Huez a mustra tambe cu tin whatsapp entre Oduber y Marisol L, na 2020, cu ta bisa cu tin hendenan di dje ta wordo kita Serlimar, pero no esnan di AVP. Segun Oduber a splica huez, door di Marisol su actitud di kier laga un compania priva tuma Serlimar over, cu esey no ta cuadra cu e maneho di partido. Tambe Oduber a clarifica cu loke e kier meen ta cu ‘nos hendenan ta wordo kita, no kier men esnan di partido POR, sino hendenan cu ta trahando na Serlimar’. Ora cu huez a confronta Oduber cu un procesverbaal riba e dama D, cu a wordo nombra como directora na Serlimar door di Oduber, Oduber a desmenti esaki. E la bisa cu D a wordo kita di Serlimar door di e management team pasobra e lo a horta placa. 

ODUBER TA EMOCIONAL

Na momento di trata e parti di asuntonan personal, Oduber a bira emocional. E la conta con e la bin cu e concepto di proyecto Bochincha, cu tabata bayendo bon. Pero debi na e acusacionan contra dje, di entre otro labamento di placa cos a bay malo. Hasta e la divorcia e tempo ey, y tampoco tabatin of por a haya un cuenta bancario pa e negoshi. Akinan Oduber a bira emocional, y cu lagrima na wowo, e la bisa cu un hende cu tabata un tempo vice prome minister, awe ta bibando cerca su mama, den un apartamento. Y cu cinco aña y 2 luna, awor e ta para den corte. Tambe a menciona e caso di corte contra Aruba Bank pa haya su cuenta bancario, cual caso a dura por lo menos 3 aña. A dura tambe segun Oduber, 2 aña y 6 luna sin cu tabatin un sentencia. Y despues Aruba Bank ta sigui pa cera su cuenta debi cu ta sospeche di ta den un organisacion criminal. Tur ta acusacionan cu Oduber a desmenti. Tambe Oduber a papia di un debe di 500 mil florin contra dje. Ora cu huez a puntra Oduber, con e ta mira su futuro, Oduber a bis acu tur cos ta depende di huez. E ta sigura tambe cu e no por confia mas den Ministerio Publico. Tambe e la mustra cu 6 di December tin eleccion, y cu e caso aki ta bahe full na suela. E la papia di su operacion cu e la haci na 2023 y cu awor di salud e ta ok. Y finalmente, e trato cu e ta bisa di a haya tempo cu e tabata cera na KIA, tabata pa kibre mentalmente. Aki huez a pare, y a bise cu durante su defensa, e lo por papia mas. Despues huez a trata e asunto personal di e otro sospechosonan, y despues a schors e tratamento te cu dialuna 10;30 ora cu Ministerio Publico lo cuminsa cu nan rekisitorio.