Protesta contra violencia pa Mitch Henriquez a sali fo'i man

DEN HAAG – E protesta organisa pa mustra sosten contra violencia, na honor di Mitch Henriquez dialuna anochi, a bay for di man. Mientras cu e prome informe, tabata cu e situacion a cuminsa trankil, e la bira mas tenso cu a pone cu mobile eenheid (riot commando) mester a presenta. Esnan presente a cuminsa tira polis cu piedra y kier a haci intento pa drenta e warda di polis na Heemstad. E ora ME a cuminsa actua y parti sla na esnan cu tabata causa disturbio.

E PROTESTA

Manera anuncia, un grupo di simpatisante, amigo y familiares a protesta dialuna atardi dilanti warda di polis di Heemstraat, contra loke a pasa cu e arubiano Mitch Henriquez. E ‘protesta’ mes tabata programa pa 8:30pm (ora di Hulanda). E intencion tabata pa demonstra cu ciudadanonan no ta tuma mas violencia di polis, manera cu a sosode diadomingo cu nan amigo Mitch Henriquez. Riba e potretnan, cortesia di conocido fotografo Shanna Rodriguez, por mira e momentonan tanto riba potret como video, di e anochi di protesta aki.

E CASO

Mitch Henriquez, manera ta conoci caba awor,  a wordo aresta cu man duro door di polis na Zuiderpark na Den Haag durante un evento musical. E motibo segun Ministerio Publico ta, cu e persona lo a bisa cu e tin un arma cu ne. Mientrastanto den curso di awe nos a ricibi e noticia lamentabel cu sr. M. Henriquez a fayece despues na hospital. Rijksrecherche bou guia di Ministerio Publico na Den Haag a cuminsa cu un investigacion di e detencion. Mientrastanto a habri un registro pa condoleer. Check e condoleanceregister aki.