Den caso Flamingo, Otmar Oduber a desmenti di a privilegia cierto hendenan cu tereno

ORANJESTAD – E caso penal di Flamingo a sigui diaranson mainta despues cu huez a trata e demanda di e abogadonan pa declara OM no admisible. Huezdespues di a splica cu e demanda ta prematuro y cu e por trata esaki mas laat durante tratamento di e caso of na final, a sigui e mainta, buscando claridad cerca Oduber (Otmar:red) riba un di e puntonan di e caso, unda cu tabatin ‘bruhamento’ di otorgamento di 4 tereno, specificamente un asina yama double booking di tereno den e area di Malmok y Palmbeach na cuater ciudadano, esta ciudadanonan B, F, P, y G. E huez tabata interesa pa sa di Oduber prome, riba su maneho, pa despues compronde unda a surgi e fayo unda cu tabatin otorgamento di tereno ekiboca. Loke a resalta, ta cu lo tabatin un ekibocacion di otorgamento di tereno, pero cu por a wordo interpreta pa ministerio publico como un trato privilegia di e minister e tempo ey. Algo cu Oduber a desmenti categoricamente durante e tratamento caso. A confronta e otro sospechoso den e caso Richinella W, cu durante e proceso, tabata encarga cu parti di e proceso na DIP, pa clarifica kico por a pasa cu tabatin un bruhamento entre dos persona pa e mesun tereno. Mas specifico e hecho cu lo a kita tereno otorga na un persona, ciudadano G, pa duna e ciudadano P. Segun Oduber, a duna orden solamente pa coregi e problema, pa cumpli cu e proceso y decisionan anteriormente tuma durante reunionan teni. A sigura huez cu ningun momento a usa su poder como minister pa privilegia un ciudadano riba otro. E fayo segun Oduber, tabata na DIP unda cu a bruha e lista riba cual tabatin e nombernan di e esnan cu lo a haya tereno e tempo ey. Usando prueba di e.o, conversacionan di whatsapp, y analisando e cartanan manda na e ciudadanonan, a purba clarifica e trafico di informacion riba e tema, pa pinpoint, e fecha y ora di combersacionan unda cu e confusionan aki por a tuma lugar.