Corte superior a ‘bolter’ sentencia den caso ‘Alpina’ di bara di oro

ORANJESTAD - Corte Superior di Husticia a dicta sentencia dialuna 18 di november den e caso ‘Alpina’ contra e sospechosonan R.A.G.Z. y J.C.T.R. E caso aki, cu ta conoci como e caso di oro, a sali na cla riba 9 di februari 2018, ora G.Z. a wordo deteni na airport cu 46 bara di oro cu un peso total di 55 kilo, den su ekipahe di man. E tabata na caminda pa Hulanda, cu destino final Dubai. E baranan di oro tabata procedente di Venezuela.

SENTENCIA PROME INSTANCIA 

Na juli 2022 Corte den Prome Instancia a declara e sospechosonan G.Z. en T.R. liber di falsificacion y labamento di placa. Ministerio Publico a bay den apelacion contra e decision aki.

CORTE SUPERIOR 

Ayera Corte Superior di Husticia a destrui e sentencia di Corte den Prome Instancia y a condena e sospechosonan pa respectivamente 113 dia y 6 luna pa falsificacion y labamento di placa.

E BARANAN DI ORO 

Corte Superior a declara e 46 baranan di oro decomisa (verbeurd). E baranan ta representa na e momento aki un valor di mas cu Afl. 8 miyon. E consecuencia cu e baranan di oro a wordo decomisa ta cu, una vez e sentencia bira irevocable, nan lo bira propiedad di Pais Aruba.