Arends: Fin di 2025 ta completa proyecto Animal Welfare Center

ORANJESTAD - Cu colaboracion di stakeholders y departamentonan di Gobierno, Minister Arends a informa cu a cuminsa e fase di groundbreaking pa e prome Animal Welfare Center na Aruba.  Minister Arends a anuncia desaroyo den cuadro di e vision pa bienestar di animal na Aruba. Segun e mandatario, desde aña 2022 a bin ta traha riba e proyecto pa crea un centro pa bienestar di animalnan na Kibaima.  

Animal Welfare Center (AWC) ta un centro pa acomodacion, cuido y rehabilitacion di cacho, pushi y otro animalnan domestico. Ademas, e lo fungi como un centro di recurso pa nos comunidad pa busca informacion, ayudo y servicionan medico pa nan mascotanan of otro animalnan domestico. 

Un centro pa acomoda animalnan cu ta wordo recogi for di caya of confisca pa casonan di maltrato. Den e centro aki lo tin haulanan special pa acomoda un total di 60 cacho y 40 pushi. Asina nan lo ricibi cuido, rehabilitacion y tambe pasa pa adopcion pa sigura cu tur animal ta haya un segundo oportunidad na bida. Alabes lo bay tin un departamento di cuarentena pa animalnan cu ta drenta ilegalmente na Aruba y tambe un clinica pa por duna servicionan medico na nos animalnan.  

E construccion di AWC a inicia desde 15 di november 2024, y lo habri su portanan oficialmente na final di 2025.