Caso penal Flamingo cu sospechoso principal Otmar Oduber ta inicia awe mainta

ORANJESTAD – Awe dialuna mainta ta inicia e caso penal tan anticipa Flamingo, den cual e sospechoso principal ta ex minister y actual lider di partido politico PPA, Otmar Oduber. Inicialmente e caso tabatin di haber cu practica fraudulento tempo cu Oduber tabata mandatario entre November 2017 y December 2019. Sinembargo segun e propio Oduber, e cargonan a cambia asina hopi te cu e tabata papia di un caso Flamingo 3, pasobra di e prome cargonan, hopi no a keda vigente. E caso ta cuminsa awe mainta 8:30am, y ta programa pa sigui riba varios dia unda cu tin cu scucha varios otro sospechoso, den cual un di nan tabata (te ainda) su propio yiu homber mayo J.O.    

PERSIGUI VARIOS PERSONA

Durante curso di tempo, Ministerio Publico a sigura cu fuera di Oduber, lo a persigui por lo menos 7 persona mas. Varios di e personanan aki a keda deteni tambe durante e curso di investigacion y despues di un tempo, recobra nan libertad temporal. E tempo ey, ministerio publico tabata bisa cu e hechonan castigabel pa cual ta persigui e sospechosonan, tabata estafa, maluso di poder, corupcion (activo y pasivo) y falsificacion. OM ta mustra tambe cu Corte den Prome Instancia a wordo poni na haltura di e intencion pa cita e sospechosonan aki.

DETENCIONAN

Tabata riba 2 di maart 2022, e prome detencion den e caso aki a cay, e persona femenino di fam E. Despues a sigui e di dos detencion 5 dia despues unda cu a detene e comerciante F. Croes. Despues a dura un rato pero riba 26 di maart 2022, a detene e yiu homber di e ex mandatario J.O. Y finalmente, riba 10 di mei 2022, a detene Oduber mes, como e sospechoso principal di e caso y despues di 10 dia a recobra su libertad.