OM: Caso di soborno polis door di reportero, no por sconde bou di ‘libertad di prensa’

ORANJESTAD – E caso di reporteronan sospecha di a soborna un polis, no ta cay bou di libertad di preonsa. E fiscal di ministerio publico diabierbna ora di e rekistorio, a cuminsa na clarifica cu e caso aki no ta cay bou di e capa di libertad di prensa, pues no por usa esaki como e defensa di e reporteronan. Un reportero ta mesun culpable cu cualkier otro persona cu comete un acto ilegal, segun e fiscal. “ No ta interesami ken ta e fuente. Mi no ta importa kico nan ta skibi, y no ta pa cera nan boca. Un periodista no por cumpra un polis. Si periodista haci algo asina, e ta bira castigabel” e fiscal a cuminsa na bisa. 

PRENSA PROME PRESENTE

E pregunta cu pa hopi tempo tabata vigente, esta con prensa tabata presenta asina lihe na un suceso policial, hasta tin biaha prome cu polis mes, a haya un claridad cu e caso aki segun e fiscal. “Pasobra prensa tabata scucha e informacion di polis” e fiscal a bisa, indicando cu pa colmo, esaki no ta prome biaha, y mas pio ainda, un di e sospechosonan awor, tin un sentencia caba pa algo similar. 

USA PORTOFOON

Segun e fiscal, durante un entrada hudicial na cas di e awor ex agente policial, a bin haya henter un set up di ekipo cu tabata wordo usa pa scucha polis, cu tabata wordo pasa e ora pa cierto reporteronan, a cambio di sea placa of fabor. E caso a cuminsa ora cu KPA a haci denuncia di algun portofoon di polis (radio cu polis ta usa pa comunica cu otro), por lo menos 4, cu a wordo localisa na e cas en cuestion. E ta cuadra cu e investigacion haci, unda cu di e 4 portofoon, por lo menos 3 tabatin un localidad constante segun nan señal di GPS riba e telefon. E telefonan aki a wordo haya na e cas aki, conecta na un laptop cada un, cu un coneccion na cada un di e reporteronan, segun e fiscal. 

ADMISION

Fiscal, despues cu huez a cuestiona cada sospechoso riba e informacion adkeri, a confronta e sospechosonan cu e informacion adkeri. Segun e fiscal, Vos a admiti cu e tabata suministra e reporteronan trahando pa e medio 24ora, Mas Noticia y Awe24, cu informacion confidencial di polis. Vos a basha abou riba e reporteronan, cual informacion anteriormente a keda desmenti categoricamente pa e reporteronan. Segun Vos, e tres reporteronan a suministra e material, esta laptop y wayanan y cellular, y a cambio e polis tabata suministra nan cu e portofoon. E reporteronan separadamente a pidi Vos pa nan cada uno haya un di e radionan a cambio di pago, pero Vos a sigura cu e la nenga esaki. E radionan no por a sali di su cas, pero si e tabata dispuesto pa pasa e informacion via e sistema pa nan. Mientras cu cada reportero a actua indivualmente, e di cuater sospechoso K, a yuda A. cu e proceso di set up y entrega di ekipo na cas di Vos, segun e polis su declaracion. Segun Vos, e no a haya pago directo pa e trabou, pero si tabata fia placa aki aya, y tabata suministra informacion confidencial di polis, a cambio di material manera bebida, sponsorhip pa deporte pa su yu, y trabounan di cas. Vos segun su declaracion a rechasa pago mensual di A, di 1500 pa luna pa e trabou.   

ACTITUD DI SOSPECHOSONAN SEGUN FISCAL  

Segun fiscal, e unico cu a papia, tabata L. cu mientras cu e tabata duna informacion, tabata bruha informacion, creando un situacion remarkable. Segun fiscal, hopi biaha L tabata duna informacion contradictorio, y  of tabata keda keto. “E ta sufri di perdida di memoria, of e tin memoria selectivo” e fiscal a bisa den tono sarcastico. Pa loke ta K, esaki tambe a declara poco y no kier a bisa nada di e appnan cu a confronte cu ne. E ta sigura cu nunca e la bay cas di Vos, y pio ainda, tabata sigura di no sa unda Vos ta biba. Segun fiscal, malo pa K, pasobra Vos lo a contricie riba tur esaki. Fiscal riba e sospechoso G, ta bisa cu G ta sigura cu e no tabata haya informacion di Vos, y tampoco tabata su amigo. Loke si G a admiti, ta cu e la presta Vos placa repetidamente. E informacion cu G tabata duna, ta hopi vago. Cu e no sa con e app tabata yama, ni con e tabata funciona. Algo cu Vos a contradeci tambe. Pa loke ta sospechoso A, fiscal a bisa cu e la wordo scucha dow biaha, y no a bisa hopi. Segun A, ta Vos tabata pidi sponsorship pa algun cos. E la admiti cu e tabata amigo di Vos, pero cu nunca e la paga Vos pa informacion. Cu e la scirbi cos bon di Vos den media, no ta nada straño, pasobra segun A, tur hende cu haci algo positivo, ta haya un ‘pluimpje’ di dje den media. Nada mas, nada menos. 

VOS TA CONTRADECI DECLARACION DI SOSPECHOSONAN

Fiscal a splica despues cu ora cu a confronta Vos cu e declaracionan di e sospechosonan, e la contradeci tur cos. Un pa un. No tabata compronde pakico algun tabata desmenti nan amistad, envolvimento den e proceso, y mas. E ta admiti cu nan tabata bishite, tabata su amigo, y cu e tabata complice di duna informacion di polis na e reporteronan.