Maneho di minister riba Green Corridor den parlamento awe

ORANJESTAD – E reunion publico awe tardi riba e proyecto Green Corridor tin cu trece claridad riba e situacion actual di e proyecto. Tin un division entre fraccionan politico pa cu e asunto y si merece mas conseho riba e asunto, y e intencion ta pa e minister en cuestion Benny Sevinger splica su motibonan pakico e proyecoto lo costa placa, y mas importante, pakico no mester di parlamento pa aprobacion pa e placa extra aki.

REUNION

E reunion ta programa pa cuminsa 2’or y tin cu duna e mandatario e oportunidad pa hustifica su peticion pa mas placa pa e proyecto, sin ‘cana e caminda regular’. E mandatario ta sigura cu e forma con e kier prosegui, ta esun corecto y necesario. Esta sin un adaptacion di e ley cu a dune aprobacion na 2010 caba pa un suma di 292 miyon florin. Awe e mester di mas placa pasobra cosnan a bira ‘mas caro’.

AVP

Fraccion di AVP a sigura cu e proyecto ta bon, y cu no mester di mas conseho pa hustifica e accion di e minister di e mesun partido. A haya tur conseho necesario caba, y como tal nan ta satisfecho cu e proyecto su progreso y tambe e forma con e mandatario kier prosegui. Nan no ta sinti cu mester di mas investigacion ni conseho di e.o. Raad van Advies of otro instancia.

MEP

Fraccion di MEP ta considera e asunto uno no corecto y dudoso, pa cual nan kier mas investigacion y conseho di entre otro Raad van Advies. Falta di esaki a pone cu siman pasa na dos occasion a protesta contra vice president di parlamento Chris Dammers y a hiba nan disgusto te serca gobernador. Nan ta sinti cu e minister en cuestion mester pasa parlamento pa cambia ley, sino e no por hustifica mas placa sin mas. Nan ta considera e proyecto uno cu ta hole corupto y un gastamento di placa sin cu e pueblo por cu esaki.