Oduber: Disputa di color di partido entre PPA y RAIZ a keda regla

ORANJESTAD – E disputa di color di partido politico entre partidonan PPA y RAIZ a keda soluciona diahuebs mainta tempran. Lider di e partido PPA Otmar Oduber a confirma na noticiacla cu despues di a mira personalmente kico e colornan ta, a nota cu mientras cu Electorale Raad ta considera e color otorga na RAIZ como oraño cla, esaki realmente ta e color peach, pues leu di oraño. Como tal, no tin ningun problema mas pa haci algo riba e tema, pasobra e colornan ta diferencia claramente for di otro y no tin posibilidad pa bruha. Cu esaki, no tabatin necesidad pa dedica mas atencion y tempo na e asunto aki cu a surgi anteriormente. 

E PROBLEMA 

Tabata diaranson atardi cu lider di e partido PPA (Oduber:red) a bisa di lo atende cu un protesta pa loke ta e color otorga na partido politico RAIZ, cu ta oraño licht. Lider di e partido Otmar Oduber a confirma esaki diaranson anochi pa Noticiacla, indicando cu no por ta asina cu tin dos color oraño, aunke uno ta licht y e otro regular. Segun Oduber, cierto colornan ta dificil pa tin un distinccion aden, manera e color oraño. Ademas segun Oduber, RAIZ a usa e color shinishi como nan color durante dos eleccion caba. E ta mustra cu e problema tambe ta cu e colornan casi similar, lo por confundi e votador, pio cu e partidonan ta ubica banda di otro riba e biljet. Awor e asunto ta regla y tur dos partido lo ta contento cu nan color.