Partido PPA a entrega protesta contra RAIZ pa motibo di color di partido

ORANJESTAD – Partido PPA lo atende cu un protesta pa loke ta e color otorga na partido politico RAIZ, cu ta oraño licht. Lider di e partido Otmar Oduber a confirma esaki diaranson anochi pa Noticiacla, indicando cu no por ta asina cu tin dos color oraño, aunke uno ta licht y e otro regular. Segun Oduber, cierto colornan ta dificil pa tin un distinccion aden, manera e color oraño. Ademas segun Oduber, RAIZ a usa e color shinishi como nan color durante dos eleccion caba. E ta mustra cu e problema tambe ta cu e colornan casi similar, lo por confundi e votador, pio cu e partidonan ta ubica banda di otro riba e biljet. 

CONTROL DIAHUEBS MAINTA

E intencion awor ta cu diahuebs mainta 8’or y mei, Electorale Raad lo scucha Oduber y lo mira e colornan pa dicidi si ta bin cambio, esta cu si cos ta keda manera cu e ta, of si ta un solo color oraño ta bin y cu si e color shinishi, eventualmente ta bay bek pa RAIZ.