Plasterk ta sigura Mike Eman investigacion riba morto Henriquez

DEN HAAG – Awe mainta minister di relacionan di Reino Ronald Plasterk a papia telefonicamente cu tanto prome minister Mike Eman como minister plenipotenciario Alfonso Boekhoudt, riba e morto di ciudadano Mitch Henriquez. Aki e la sigura ambos, cu lo bin un investigacion independiente riba e caso aki, door di rijksrecherche, pa trece clarificacion di e asunto. “Mi ta spera cu pronto lo por tin clarifad riba e asunto aki” Plasterk a finalisa bisando.

ARUBAHUIS

Gabinete di Aruba ta exigi cu mester bin un investigacion imparcial pa haya asina aclaracion di e uzo di tanto forza. Den un comunicado dialuna mainta, Minister Plenipotenciario, Alfonso Boekhoudt, a duna su prome reaccion official riba e caso lamentable di e arubiano Mitch Henriquez (42) cu a muri den fin di siman na Hulanda despues di un confrontacion cu polis hulandes. Henriquez, manera ta conoci caba awor,  a wordo aresta cu man duro door di polis na Zuiderpark na Den Haag durante un evento musical. E motibo segun Ministerio Publico ta, cu e persona lo a bisa cu e tin un arma cu ne. "Mientrastanto den curso di awe nos a ricibi e noticia lamentabel cu sr. M. Henriquez a fayece despues na hospital". Rijksrecherche bou guia di Ministerio Publico na Den Haag a cuminsa cu un investigacion di e detencion.

MINISTERIO PUBLICO

Segun Boekhoudt mientrastanto, ya el a hiba conversacion cu representante di Ministerio Publico y a acorda pa duna seguimento awe mes riba e caso. “ Ministerio Publico a priminti cu lo bin un investigacion forensico pa determina e causa exacto di e fayecimento”, Boekhoudt ta sigui bisa.

FALTA DETAYES

“Na e momentonan aki e Gabinete di Ministro Plenipotenciario di Aruba na Hulanda (Cas di Aruba) no tin tur detaye ainda di e susedido sinembargo un cos ta sigur: tur detaye mester bin na luz di dia. E famia tin tur derecho di haya sa exactamente kico a pasa y con ela pasa”, e mandatario a continua bisando.