Gobierno kier IMF recomenda e miho sistema y norma financiero pa Aruba

ORANJESTAD - Gobierno di Aruba kier pa Fondo Monetario Internacional (IMF) recomenda e miho sistema y norma financiero pa Aruba. Minister (Xiomara) Maduro di Finansa a informa cu tin un team di ehecutivo di IMF na Aruba pa asina brinda asistencia tecnico riba e topico di ‘fiscal rules.’ Ta trata di un grupo di experto di IMF su Fiscal Affairs Department hunto cu ehecutivonan di IMF su organisacion pa brinda asistencia tecnico den Caribe, CARTAC, cu riba peticion di Aruba y Hulanda ta bay duna un recomendacion cual ta e miho normanan financiero pa Aruba mantene su mes na dje pa asina por logra un maneho financiero cu ta sostenibel pa Aruba.

MIHO SISTEMA

For di aña 2013 Aruba a bin ta conoce varios Protocol cu Hulanda den cual a stipula normanan financiero pa logra mehora e maneho financiero di Aruba. Na aña 2015, a introduci e Ley di supervision financiero LAFT den cual a codifica normanan financiero y na fin di 2023 a bolbe ankra normanan financiero nobo den e Ley di LAFT. Sinembargo nunca a haci un investigacion pa saca afo si e normanan financiero aki realmente ta yuda haci Aruba su finansa publico sostenibel. Cu e motibo aki Aruba y Hulanda a acerca IMF pa investiga e situacion na Aruba y recomenda cual sistema cu cual normanan financiero lo por duna un miho resultado pa Aruba.

MIHO BISTA

Como parti di nan investigacion e grupo di experto di IMF y CARTAC recientemente a reuni cu Minister Maduro, y lo reuni ademas cu varios stakeholders pa asina por haya un miho bista di e situacion y deseonan cu ta biba na Aruba, pa por brinda un recomendacion pa normanan financiero nobo pa Aruba.