STA: Construccion na Aruba ta sigui plat dialuna!

ORANJESTAD – Siman ta habri cu construccion ketobai plat na Aruba. Awe mainta tempran president di sindicato di trahadonan di Aruba, Diego de Cuba a confirma na NoticiaCla.com cu ‘accion ta continua’. Esaki ta nifica cu tanten cu directiva di WAB no duna oido na nan peticion pa firma CAO, trahadonan no ta reanuda trabou. For di siman pasa caba e trabounan ta paralisa na varios proyecto grandi manera aeropeurto, hospital y barcadera.

SITUACION SIMAN PASA

For di diahuebs, construccion na companianan grandi ta plat. Mayoria di proyectonan den construccion na Aruba a drenta fin di siman asina. Diahuebs tabata e prome dia cu e trahadonan a pone trabou abou na e varios proyectonan den construccion, pa motibo di problema laboral. Ta trata di trahadonan den construccion cu ta forma parti di WAB (companianan afilia di construccion), manera companianan di Thiel Corporation, Albo, Wegenbouw y algun mas cu ta afiliando na STA, cu na tur ta entre 350 pa 400 trahado.

ACTITUD TERCO

Segun de Cuba, e actitud di hefenan di WAB ta uno terco y ta nenga di continua cu e CAO, y kier firma te dialuna 3’or. Algo cu obviamente e sindicato y su miembronan no ta acepta. Como tal awe caba a dicidi di pone trabou abou, paralisando e trabounan cu tin riba varios proyecto, manera aeropuerto, waf, barcadera, y hospital, djies pa menciona algun.