CFT ta reuni cu Mike Eman awe na Aruba

ORANJESTAD - College Financieel Toezicht (CFT) ta bishita Aruba awe y mayan pa entre otro splica gobierno di Aruba un biaha mas riba nan tarea. Durante e encuentro cu entre otro prome minister Mike Eman, nan lo splik’e un biaha mas kico tur CFT ta haci y ta nan tarea. Esaki como reaccion riba un declaracion cu Eman a haci recientemente na Aruba riba e funcionamento di CFT na Aruba. Fuera di gobierno, e organo di supervision financiero lo bishita un cantidad di otro instancia, manera gobernador, parlamento, Raad van Advies y miembronan di gabinete Mike Eman II.

BISHITA CFT

Tabata siman pasa cu NoticiaCla.com a raporta caba cu e siman aki  un delegacion di College Financieel Toezicht ta na Aruba pa papia cu entre otro gobierno di Aruba riba nan trabou. NoticiaCla.com a aserca CFT pa haya reaccion riba e comentario di premier Mike Eman recientemente, unda cu Eman a indica cu e sugerencianan di CFT ta ‘vrijblijvend’ esta cu no ta obligatorio pa tuma e consehonan. CFT riba esaki tabata hopi breve. “CFT gustosamente lo atende e asunto aki cu gobierno di Aruba, ora cu e bishita e isla proximamente”. E bishita pues, ta cuminsa awe mainta. 

REACCION EMAN

Informacion cu NoticiaCla.com tin, ta cu ni CFT ni gobierno hulandes no a keda contento cu e reaccion di premier Eman riba CFT, ya cu e informacion cu Eman a duna, no ta cuadra cu e realidad. Esaki pasobra ta parse cu Eman ‘no a compronde e trabou di CFT’. Fuentenan a recorda NoticiaCla.com cu for di momento cu CFT a encarga nan mes cu e presupuesto di pais Aruba, (riba peticion di Aruba mes) nan (CFT) ta esun cu ta scrutina esaki y ta bin cu recomendacionan ora cu mester. E recomendacionan aki ta wordo manda pa gobierno di Aruba, cu na su turno por implementa medidanan adicional. Ta ora cu esaki no sosode, of no suficiente, y e vision di conseho di minister ofrece insuficiente solucion, e ora conseho di minister di Reino por (riba conseho di CFT/CAFT, haci uso di e medidanan na su alcansa, manera un aanwijzing of maatregel. De hecho, contrario na declaracion di Eman, e recomendacionan aki ta ‘bindend’ y no ‘vrijblijvend. Unabez cu e recomendacionan aki wordo haci, ta keda na RMR pa implementa ‘sanccion’ pa Aruba si gobierno no cumpli’ cu e recomendacionan haci.

BISHITA CORTICO

CFT lo ta na Aruba otro siman pues pa un bishita cortico, unda cu nan lo topa (manera cu nan a confirma na NoticiaCla.com) cu gobernantenan, aunke no ta confirma cu ken exactamente nan lo topa. Ta durante e bishita aki, NoticiaCla.com a compronde, cu nan lo splica gobierno un biaha mas kico nan tarea ta y kico tur tin cu sosode, pa evita cu Aruba haya su mes den un problema cu gobierno di Reino. No gobierno di Hulanda.

TOPICONAN

Topiconan entre otro por ta e analisis di e presupuesto, nan interpretacion vs e interpretacion di gobierno, y tambe e avanse di e formacion di CAFT. Manera cu NoticiaCla.com a raporta den un otro articulo, cosnan no ta canando mucho bon cu esaki. Mientras cu tin papia cu Aruba a haya un candidato, esaki no por wordo confirma pa ningun instancia. Loke si NoticiaCla.com a haya confirma, ta e hecho cu e ley mes pa formalisa formacion di e supervision arubano di CFT, ta confrontando obstaculonan pisa y cu ta conta cu mas retraso aun.

GOBIERNO VS RMR

Tambe NoticiaCla.com a compronde cu e separacion di gobierno hulandes for di gobierno di Reino, no ta mucho cla. E impression eroneo cu ta gobierno di Hulanda ta dicidi riba Aruba, no ta corecto. Atrobe, gobierno di Hulanda no ta esun cu ta mete cu e presupuesto di Aruba, sino conseho di minister di Reino. Y den e caso aki, tabata riba riba propio aprobacion di gobierno di Aruba (via protocol 2 di mei), a laga CFT encarga cu esaki. Ora cu CFT analisa y duna su raportahe pues, e no ta duna esaki na gobierno di Hulanda, sino na gobierno di Aruba, (manera indica anteriormente). E decision final pues, no ta di gobierno di Hulanda, sino di Conseho di minister di Reino. Aki ta unda cu e decision final ta cay, si Aruba ta cumpliendo of no.