WEB Aruba y Wärtsilä a firma acuerdo pa aumenta capacidad di coriente

ORANJESTAD -  Dia 31 di october 2024 WEB Aruba y Wärtsilä Finland Oy a firma un acuerdo pa e ‘RECIP 3 Expansion Project,’ cual ta encera expansion di planta RECIP III cu dos motor. Ta trata di un aumento di e capacidad actual cu 36 MW. Cu e expansion aki lo yega na un total di 230 MW (capacidad instala) di motornan RECIP. A celebra esaki durante un ceremonia dia 8 di november ultimo den workshop den planta di WEB den presencia di colega y invitadonan.  

E proyecto ta necesario pa por cumpli cu demanda creciente di energia riba termino medio. Manera ta conoci, na augustus 2024 WEB a implementa e planta mobil di 20 MW pa atende cu e demanda pa energia riba termino cortico. Ademas, WEB ta explora posibilidadnan pa instala baterianan pa almacena energia. Nos expertonan ta consciente di e necesidad imperativo pa sigui explora y studia maneranan pa facilita e expansion di energia renovabel na Aruba. E meta di e iniciativanan aki ta pa cumpli cu e demanda creciente pa energia, pa awor y den futuro.