Arubahuis: Ta exigi investigacion imparcial riba morto Henriquez

DEN HAAG – Gabinete di Aruba ta exigi cu mester bin un investigacion imparcial pa haya asina aclaracion di e uzo di tanto forza. Den un comunicado dialuna mainta, Minister Plenipotenciario, Alfonso Boekhoudt, a duna su prome reaccion official riba e caso lamentable di e arubiano Mitch Henriquez (42) cu a muri den fin di siman na Hulanda despues di un confrontacion cu polis hulandes. Henriquez, manera ta conoci caba awor,  a wordo aresta cu man duro door di polis na Zuiderpark na Den Haag durante un evento musical. E motibo segun Ministerio Publico ta, cu e persona lo a bisa cu e tin un arma cu ne. Mientrastanto den curso di awe nos a ricibi e noticia lamentabel cu sr. M. Henriquez a fayece despues na hospital. Rijksrecherche bou guia di Ministerio Publico na Den Haag a cuminsa cu un investigacion di e detencion.

MINISTERIO PUBLICO

Segun Boekhoudt mientrastanto, ya el a hiba conversacion cu representante di Ministerio Publico y a acorda pa duna seguimento awe mes riba e caso. “ Ministerio Publico a priminti cu lo bin un investigacion forensico pa determina e causa exacto di e fayecimento”, Boekhoudt ta sigui bisa.

FALTA DETAYES

“Na e momentonan aki e Gabinete di Ministro Plenipotenciario di Aruba na Hulanda (Cas di Aruba) no tin tur detaye ainda di e susedido sinembargo un cos ta sigur: tur detaye mester bin na luz di dia. E famia tin tur derecho di haya sa exactamente kico a pasa y con ela pasa”, e mandatario a continua bisando.

COMPRENSION Y TRISTESA

“Nos tin pleno comprencion pa tristesa y frustracion di parti di e famia y amigonan, pesey mes nos ta haciendo e maximo esfuerso pa e proceso cu tin cu ser encamina trece e berdad di loke a pasa na claridad. Nos ta haci un apelacion tambe na tur esnan cu por sa algo di loke a pasa of tin video di loke a pasa pa duna tur cooperacion na e autoridadnan cu ta investigando e caso. “ e mandatario ta finalisa bisando.

FRACCION MEP

Otro reaccion politico, pero for di Aruba, tabata di lider di fraccion di MEP, Evelyn Wever Croes, cu a manda un carta pa ministerio di asuntonan di Reino y Minister Plenipotenciario di Aruba na Hulanda. "Manera cu mi a haya e noticia cruel mi a tuma contacto cu ministerio encarga cu asuntonan di Reino y cu Minister Plenipotenciario, y awe nos a manda un carta pa Prome Minister Rutte, Minister di Husticia Hulandes, Minister encarga cu asuntonan di Reino y Parlamento Hulandes pa hasi un investigacion profundo den tur locual a socede, y pa informa nos mas pronto cu ta posibel. No tur ora nos por preveni inhusticia, pero nos lo lucha si pa husticia vence. Nos ta wardando contesta riba nos carta, pa evalua sigiente pasonan. Wever ta sigui mustra cu ' e morto di nos amigo Mitch a shock henter nos comunidad, y si famia y amigonan merese di haya sa kiko a pasa. Comunidad henter merece cu un investigacion profundo y obhetivo wordo hasi, y pa esnan responsabel carga nan responsabilidad. Nos ta desea famia di Mitch, su Mama Maria, su rumannan, su pareha, su yiunan hopi forsa den e tempo dificil nan dilanti, y cu Mitch sosega na paz", tabata palabranan di  Wever-Croes, lider di fraccion di MEP. (Lesa e carta aki). 

REACCION COMUNIDAD

For di momento cu e noticia a plama diadomingo, arubianonan a subi social media y mustra nan convivencia, y tambe otronan fuera di esey, a mustra nan rabia y desaprobacion pa e forma con e caso a sosode. A papia te hasta di tene un tipo di accion pa mustra nan convivencia y rabia mes momento door di pone un poster, of flornan na muraya di misa di Noord, di unda Henriquez ta bin.