Tur 11 partido nan lista di candidato a keda valida awe pa hoofdstembureau

ORANJESTAD – Hoofdstembureau di Aruba a valida lista di candidato di 11 partido politico cu ta participa na e proximo eleccion parlamentario di dia 6 di December 2024. Asina e presidente Rossi Marchena a anuncia durante un session special diabierna mainta. Esaki ta nifica cu tur e listanan ta cumpli cu e condicionan stipula pa ley, y ta ok pa participa den e eleccion. Ta trata di ACCION21, AVP, CURPA, FUTURO, LPR, MAS, MEP, HETC, PPA, RAIZ y RED. A splica tambe cu partidonan MIA y UPP nan lista a keda declara invalido y como tal no por participa na e eleccion. Esaki pasobra e.o. nan no a logra acumula e candidad di 586 firma cu tabata rekeri. Esaki a nifica cu nan no por a pasa den e siguiente proceso tampoco. Como tal nan ta keda afo. 

NUMERA Y COLORA E LISTANAN

E siguiente session ta dia 13 di November unda cu via tiramento di lot, por dicidi e sequencia di e lista, osea e numeracion di e listanan con nan lo aparece riba e stembiljet riba dia di eleccion. Ademas e colornan lo keda asigna tambe na cada respectivo partido. Ta normal cu mayoria partido por haya nan color cu cual nan ta identifica nan mes. Den pasado, sinembargo debi cu tabatin un cantidad grandi di partido, manera aworaki, cierto partido a haya un color diferente cu ta nan color cu ta identifica nan mes cune.