Pitbull, e exito di Aruba Summer Music Festival 2015

ORANJESTAD - Armando Christian Pérez a pone tur hende lubida e dos ora di tardansa pa e ultimo anochi di Aruba Summer Music Festival 2015 . Esaki pasobra Pérez  su nomber ta Pitbull. Pa hopi, Pitbull a pone hopi corda bek riba temponan di Aruba Jazz & Latin Festival, of te hasta e prome concierto di Gloria Estefan na Aruba. E calidad tabata asina superior, cu pa hopi, e la bira e concierto cu tin cu wordo supera awor. Prome cu Pitbull, Nik Rivera Caminero, conoci como "Nicky Jam", a subi stage casi 2 ora y mei despues cu e anochi mester a cuminsa. Mientras cu su actuacion di rap tabata di un artista di renombre, su cantamento si a crea basta critica. Tononan basta falso a zona durante su actuacion, y esey a hala atencion di hopi. Pero ora di rap, e la  demonstra di ta un artista di renomber internacional. E la pone e publico goza cune, for di comienso te final. Despues a sigui Aruba su DJ internacional, Eldrick Boekhoudt, conoci na Aruba porta solamente como "Nutzbeatz", cu a demonstra cu e por competi cu grandinan manera DJ Armin van Buren y tambe Dj Tiesto. Y finalmente, pa 12:30am, Pitbull mes a subi escenario, y rapidamente pone tur hende lubida e 'delay' anterior. For di comienso te final, Pitbull a pone tur hende biba cu su repertorio hopi conoci, y te hasta convence cu e ta e artista cu mester wordo supera awor. Mientras cu gran parti di su repertorio tabata consisti di duo, e la sa di presenta esaki den un forma majestral, gradiciendo tur e artistanan cu cual e la graba e produccionan aki. Mientras cu su repertorio tabata consisti di cancionan graba, e toke 'live' toch a keda logra pa e banda cu a presenta cune. Pitbull, cu su gritonan frecuente di "Aruba bo tey?", a sa di gara e curason di e publico constante y a pone cu e la demonstra pakico tabatin tanto empeño pa buske y asina sigura un exito sigur. Organisadornan tin un lista di cos pa drecha pa otro aña. Pero pa loke ta e presentacion di e line-up, nan a hit un homerun sigur, y cu e presentacion di Pitbull, por considera nan mes awor den e nivel di concierto manera cualkier grandi na Merca of Europa. Pabien!.