Un partido politico kier uni 6 cartera di minister bou di un solo ministerio

ORANJESTAD – Durante campaña politico, e partidonan participante ta presenta nan programa di partido y manera custumber, un ta mas ambicioso cu e otro. Un partido cu a hala atencion ta ACCION21 cu ta sugeri pa uni 6 cartera di minister den un solo ministerio. Actualmente tin dos minister cu tin un situacion asina, debi cu otro ministernan mester a retira abruptamente, creando un situacion particular, pero temporalmente. 

REPARTI CARTERA 

E gabinete actual Wever-Croes II a opta pa reparti e 5 carteranan di e ministernan retira, entre dos otro minister , cu ya tabatin mas cu un cartera. Pues, raro e no ta, pero e situacion actual ta pa ta un tempo limita. Den pasado a purba algo asina, y ta yame un super minister, debi na e cantidad di cartera. 

KICO E PARTIDO KIER HACI

Segun e partido ACCION21, nan kier uni e carteranan di enseñansa, salubridad, asunto social, labor, cultura y deporte den un solo ministerio y yame minister y ministerio di bienestar humano, pa desaroya un maneho integral pa nos recurso di mas importante, nos capital humano. E partido ta bisa cu Aruba ta bendiciona cu capacidad y talento excepcional den eñsenasa, salubridad y cultura. “ Mas cu un minister individual pa carga un vision, mester fondonan di inversion. Cada ministerio ta costa entre 10-20 miyon anualmente, uni dos of tres ministerio ta libera entre 20-40 miyon adicional cu por ser inverti den e respectivo carteranan. Nos kier brinda nos profesionalnan capacita di e veld e recursonan necesario pa por ofrece nos ciudadanonan e miho nivel di enseñansa posibel, e miho nivel di cuido posibel, e miho oportunidadnan posibel, pa nos tur por biba miho”, e partido ta sigui bisa.