• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: The Forgotten city, forgotten again?

Scirbi pa Tito Laclé

Un biaha mas, e districto di San Nicolas a bira e ‘cabay di campaña’ pa TUR partido. E fin di siman cu a pasa, e tabata hopi obvio. Mayoria partido drentando San Nicolas, pa asina ‘rescata’ e districto ‘perdi’ y despues ‘lubid’e’, un biaha mas despues di eleccion. Y e bishita ta yen di promesa, un mas bunita cu otro, un mas ambicioso cu otro. Y di algun e tabata mas insultante cu otro cos, ora cu nan tabata simplemente ‘copy paste’ e plannan di e campaña pasa, keriendo cu e habitantenan di San Nicolas ta kens, y cu nan ta lubida. Por casi scucha e comentarionan di e habitantenan.. ‘Ata, nan a corda riba nos atrobe’.. ‘Ata, nan mester di nos voto atrobe’.. Anto e politiconan ta kere cu un bishita durante un weekend di un ora of menos, por sigura e voto di San Nicolas. Y pa broma publicamente, cu ‘Nos a duna San Nicolas atencion’.. Loke tabata mas pret, y tambe curioso, ta cuanto partido pareu a dicidi di bay San Nicolas den e mesun fin di siman. 

CADA 4 AÑA

E problema sinembargo, ta pakico ta usa San Nicolas cada 4 aña pa busca voto, y pa critica otro kico no a wordo haci y kico si. Y e mas interesante, ta cu ni mitar di e plannan cu a keda priminti den e eleccion anterior, no a materialisa. E hotel, cu ainda tin cu mustra cu enberdad e ta e salbacion pa cu e districto, ta e unico actividad real cu por bisa cu por haci algo pa San Nicolas. Berdad cu basta a wordo haci cu parti di infrastructura di algun parti turistico, pero esey no ta bay genera trabou of un miho bida pa e ciudadano mes. E turista ta bay haya miho lugar pa parkeer y disfruta di e laman, si e hotel nobo permiti esey. 

PROMESA DI REFINERIA

E promesa di e gobierno actual pa reactiva e refineria, tabata otro promesa bashi, sin algo concreto den 3 aña. Un documento cu a lek e siman aki a mustra con problematico e plan presenta pa LNG lo tabata. Awor, diripiente ta anuncia cu lo bay desaroya e tereno, cas, caminda, etc etc. E timing ta mustra hopi curioso, net den porta di eleccion. E bon intento pa colora e ciudad cu murayanan cu bunita pintura, sigur ta algo interesante pa mira, pero otro cu esey, e no ta yuda e ciudadano di San Nicolas., Organisa un actividad turistico pa luna of siman mes eynan, no ta suficiente. E ta djis pone un druppel riba e panchi cayente, cu yama San Nicolas. 

Unda e problema real ta anto? Un di e problema ta cu e partidonan ta crea plan, promesa y yen di idea, vision, yame con cu bo kier. Problema ta cu ta produci un plan di accion, mara na un plachi financiero pero si esey tey, no ta bisa, unda ta bay saca e placa pa financia e bunita plan aki. 

SALBADOR vs CURASHI

E realidad ta cu San Nicolas NO mester di un “salbador”, sino di curashi y determinacion di un Gobierno pa haci e cambionan dificil pero necesario. Loke por observa cada 4 aña ta cu partidonan politico ta postula hendenan di San Nicolas cu lo mester bin “salba” e districto. Y despues di eleccion nan ta disparse lagando e tarima pa gruponan di interes postula nan president, Director, of lider bringa pa nan ego bou capa di cu lo “salba” San Nicolas. Loke falta ta curashi y determinacion pa kita e refineria bieu, kita e luganan di prostitucion for di centro, cuminsa inverti di berdad eynan, y atende cu e situacion precario di habitantenan di San Nicolas.