Elmar a anuncia reduccion den tarifa di coriente na Aruba cu 4.2%

ORANJESTAD – Gerencia di ELMAR ta participa diamars atardi cu entrante awe, diamars 5 di november 2024, a haya aprobacion pa reduci e tarifa di coriente cu 4.2%. E reduccion aki ta aplicabel riba e componente variabel di e tarifa di coriente. E reduccion aki a bira posibel debi cu e tarifa di compra di energia cu ELMAR ta paga na WEB a baha. E suma fiho di e prijs di coriente lo keda igual.

Na maart 2023, ELMAR a anuncia un rebaho di prijs di coriente cu 7.1%, y awor despues di ricibi un miho tarifa di compra di energia for di WEB, esaki a crea e espacio cu ta permiti ELMAR pa baha e prijs di coriente pa consumidornan. ELMAR ta cumpra, por lo mayoria, e energia cu WEB ta genera pa asina ELMAR por transmiti y distribui e coriente den tur bario di Aruba. 

Ta pidi comunidad pa tuma nota di e siguiente tabel: “Prijs Nobo di Coriente 2024”. E prijs nobo di coriente ta vigente pa e consumo di coriente durante e luna di november 2024 riba e factura cu nos clientenan post-paid lo ricibi na comienso di december 2024, y cu ta vence riba 14 di januari 2025. Pa ELMAR su clientenan pre-pago y EV ChargeUp, esaki lo bay na vigor entrante awe, diamars 5 di november 2024, for di 5or di atardi.