ABA: Aumento di tarifa pa procesa carchinan debit ta algo internacional

ORANJESTAD – E aumento di tarifa pa procesa carchinan debit ta algo internacional. Asina e asosacion di banco na Aruba, esta Aruba Bankers Association (ABA) a informa diamars atardi. Esaki ta trata pues e desaroyonan recien rond di e aumento di tarifanan di descuento pa comerciante. “ABA ta informa cu e cambio den tarifanan pa procesamento di transaccionnan di Mastercard Debit y/of Visa Debit tin di haber cu cambionan haci door di e rednan di tarheta internacional”. Asina e banconan local, esta Aruba Bank, Caribbean Mercantile Bank, Banco di Caribe y RBC Royal Bank a informa nan clientenan.

STOP PRODUCTO MAESTRO 

Segun ABA,  ta Mastercard a dicidi di stop nan producto Maestro. Esaki ta nifica cu mundialmente ta reemplasa tur tarheta di marca Maestro pa tarhetanan di marca Mastercard Debit. A diseña e producto Maestro originalmente pa uzo den tienda y na bancomatico. E marca Maestro no ta capaz di keda na altura di tecnologia nobo, manera e-commerce (pagonan online) y como tal a opta pa stop e producto. Esaki ta un cambio obligatorio impone pa e industria di tarheta cu lo afecta tur doño di tarheta di Maestro di tur banco mundialmente y lo afecta tur comerciante cu ta acepta Debit Cards.

TUR BANCO 

Tur banco local lo cambia pa sea tarhetanan di Mastercard Debit of Visa Debit, cu tin mas caracteristica di siguridad, e habilidad pa haci pagonan online y ta acepta rond mundo. Cu un miho aceptacion, siguridad avansa, capacidadnan mehora y cumplimento cu normanan di industria ta trece gastonan di procesamento mas halto, cu Mastercard y Visa International ta cobra y cu ta refleha den e tarifanan ahusta pa e comerciante.

Pa cualkier informacion adicional, ABA ta urgi tur comerciante pa tuma contacto cu nan respectivo banco.