Carlos, Elvis y Jerry a sacudi ASMF 2015!!

ORANJESTAD - Den un Harbour Arena colma cu hende (na ora di Elvis Crespo a conta por lo menos 4.000), e artistanan latino Jerry Rivera, Elvis Crespo y Carlos Vives a sacudi e prome edicion di Aruba Summer Music Festival 2015. Despues cu finalmente e concierto a cuminsa (un ora laat), Jerry Rivera a pone tur hende lubida e tardansa. Exitonan nobo, combina cu su clasiconan "bo ta corta esaki??", Rivera tabata gara tur esnan presente, den e ambiente di salsa boriqua. Pero tabata ora cu Elvis Crespo a subi, cu e publico a bira loco. Un tras di otro, su exitonan tabata resona den e arena, cu ya caba a logra yega e cantidad di 3.000 pa 4 mil persona. "Pintameee" a pone e ambiente na su climax, y laga tur e fanaticonan canta hunto. Y finalmente, despues di mei anochi, practicamente 1'or di marduga, (a programe pa ta riba tarima 12'or), Carlos Vives a caba sacudi loke tabata falta pa sacudi. E homber cu a pone Vallenato riba mapa, a mustra cu e t'ey ainda, despues di casi 15 aña, ainda e t'ine. "Mi ta wak hopi cara nobo. Esey ta bon", Vives a comenta na su publico. Tambe e no por a keda di remarca e derota cu Colombia a sufri na man di Argentina, algun rato prome (Colombia a perde di Argentina cu scor di 5-4 na penalty den Copa America), y mustra cu e mester di ayudo pa alegra e anochi. Cada artista tabatin su momento, di cual esun cu mas a hala atencion tabata Elvis Crespo pa su show y repertorio, y finalmente Carlos Vives cu despues di su ultimo presentacion na comienso di e decada aki, a sa di bolbe pone hende sacudi te despues di 3'or di marduga. Poco hende por logra wanta riba 4.000 hende te despues di 2'or di marduga den un evento asina. Na tur, organisadornan por mira atras riba un anochi exitoso, yena cu bon musica y ambiente, y sigur un gana pa continua riba dia #2 diasabra, cu e line up di NutzBeatz, Nicky Jamm y Pitbull.