Wever: Minister di Finanzas ta responsabel pa asunto di tarifa di carchi di banco y no esun di Economia!

ORANJESTAD – Gobierno tin dos ley cu Banco Central di Aruba a traha pa netamente atende e asunto di aumento di tarifa pa uso di carchi di banco (debit). Asina minister demisionario Geoffrey Wever a bisa den e programa Enfoke dialuna merdia, riba e tema aki. Manera cu Noticiacla a raporta dialuna merdia, e presidente di Comerciantenan Uni di Aruba (CUA) Frans Ponson a bati alarma riba e asunto di cobransa extra riba e transaccion cu debit card local. E minister demisionario mes momento e la sigura cu colega minister demisionario Xiomara Maduro no ta haci bon di tild’e di ta su responsabilidad pa atende e asunto aki. “Esey no ta berdad. Esaki ta un responsabilidad di e minister di finanzas. “Cu Xiomara Maduro ta pretende awor cu e no tin nada di haber y mester papia cu e minister di economia, ta den e caso aki, un hilaridad” e mandatario a bisa y a tilde colega minister, cu ta duna informacion incorecto y cu ta responsabilidad netamente di Maduro pa atende cu esaki.

NO CORECTO!

 “Pa tire awor riba e minister di Economia, no ta corecto!” Segun Wever, tin dos ley cu Banco Central a traha pa gobierno di Aruba cu si nan lo a drenta na vigor awe, e minister di finanzas tabatin e autoridad pa pone maximo na e fees cu banco ta pone y e regla y manera cu ta cobra e fees. E ley segun e mandatario, no a drenta na vigor ainda, y ta bou di e responsabilidad di minister di Finanza. SEPTEMBER 2023

Segun Wever, ta for di September aña pasa por a aproba e leynan aki. “Te awe nan no ta aproba. Mester papia cu minister di Finanzas pa puntre dicon e no a percura pa e ley ta aproba awe!” Wever a bisa. “Si e tabata aproba, awe nos lo no tin e debate, pasobra e lo tabatin tur autoridad pa pone e reglanan aki” Wever a sigui bisa.