Wardacosta a detene 4 latino busca pa husticia,cu a purba huy di Aruba

ORANJESTAD – E fin di siman aki un patruya di Wardacosta a haya un boto para cla cu 4 homber latino na bordo pa bai Venezuela den area na pir pabou di Barcadera. Na momento cu e personal di Wardacosta a bai controla e cuatro personanan cu ta na e boto, a haya 2 Venesolano y 2 Colombiano. A bai cu e cuatro personanan y e boto na e base di Wardacosta na Savaneta. Dos di e personanan tawata tin nan documentonan huntu cu nan y dos otro no tawata tin ningun documento huntu cu nan.

Wardacosta mesora a tuma contacto cu e ‘Unit Mensenhandel en Mensensmokkel’ (UMM) y UMM a indica, cu dos di e hombernan cu nashonalidat Colombiano ta ser busca pa husticia na Aruba pa diferente robo. E boto a ser confisca y lo keda na base di Wardacosta pa hasi mas investigacion. E personanan cu tawata ser busca pa e robonan a bai cu personal di recherche di Cuerpo Policial di Aruba. E dos otrohombernan a bai cu personal di Guarda nos Costa. E caso lo sigi den investigacion.