RST a detene hulandes van Rey na Aruba pa labamento di placa

Posted on 6/26/2015, 1:18 PM AST | Updated on 6/26/2015, 1:49 PM AST

ORANJESTAD - E ruman homber di e politico hulandes polemico Jos van Rey,  esta H. van Rey a keda deteni na Aruba den caso di labamento di placa. RST (Recherche Samenwerkingsteam) a tuma alrededor di 2,8 miyon euro den beslag den un investigacion grandi di labamento di placa. E placa tabata scondi den pakinan di carni di galina den un container. Diamars a keda deteni den e investigacion aki, e sospechosonan R.H., R.G. y H. van R. na Aruba. Van Rey. a wordo deteni riba peticion di husticia Hulandes. Den e varios huiszoekingnan cu a tuma lugar den casnan y negoshinan na Aruba, Hulanda y Belgica, a wordo haya y tuma den beslag riba diamars casi 1,1 miljoen euro. Na Aruba mas cu 400.000 euro a wordo tuma den beslag durante huiszoekingnan e dia ey. En total e placa cu a wordo tuma den beslag ta alrededor di 3.9 miyon euro den varios biyete. Rumornan tabata core cu tabata trata di conocido comerciante van Romondt pero esaki a keda desmenti. Ta trata di van Rey, y no van Romondt 

Investigacion

Riba peticion di Ministerio Publico di Aruba, Landelijk Parket di Ministerio Publico na Hulanda y Polis Hulandes a cuminza un investigacion riba 13 di april 2015. E investigación aki ta sali di un investigación di labamento di placa, cu ta tumando lugar actualmente y den forma paralelo na Aruba.

Huiszoekingnan

Polis Hulandes a tene huiszoeking diamars den tres cas y tres negoshi na ciudad di Roermond, den un cas na e lugar Lanklaar Stokkem na Belgica y na un negoshi na e lugar Bree na Belgica. Ey a tuma den beslag un total di 700.000 euro den cash, administración di negoshi y dos computer. Na Aruba, simultaneamente cu e huiszoekingnan na Hulanda y Belgica, a ristra na cuatro cas y cuatro negoshi. Ey a haya y a tuma beslag alrededor di 440.000 euro. Tambe a tuma den beslag entre otro, tres holoshi Rolex, drie auto di luho y dos motorcycle.

Labamento di placa

E sospechosonan ta wordo sospecha di, den organizacion of no, labamento di placa procedente di crimen. E placa aki tabata wordo ricibi door di nan mes of otronan, maneha, cambia y scondi na lugarnan desconoci pa otronan. E sospecho ta cu e negoshi di productonan di carni di e sospechoso H. van R. tabata wordo usa pa manda placa cash di Hulanda pa Aruba.

Detencion

Contra un di e sospechosonan deteni na Aruba, huez-comisario na Hulanda a saca un ordo di detencion. Contra e otro dos sospechosonan cu a wordo deteni aki na Aruba, esta, R.H. y R.G., detencion lo wordo pidi na Aruba mes.