A cambia reunion publico pa 'bijeenkomst' cu premier Wever-Croes pa seguridad

ORANJESTAD – E ‘oproep’ pa e reunion di Parlamento pa trata supuesto metemento di prome minister Evelyn Wever Croes den Ministerio Publico, a sali diahuebs merdia. Loke ta interesante ta cu esaki a cambia di un reunion publico (OV)  pa un ‘Openbare Bijeenkomst’ osea un OB. E diferencia ta cu den un reunion tipo OB, parlamentarionan no por presenta un mocion di desconfiansa. 

SEGURIDAD 

Presidente di Parlamento Raymond Kamperveen a splica Noticiacla cu esaki a sosode pa seguridad di Parlamento, e miembronan y e trahadonan. A compronde cu lo a haya mensahe cu lo por a spera problema si oposicion pasa un mocion di desconfiansa contra prome minister Evelyn Wever Croes. Y cualkier desrupcion, e presidente di Parlamento kier a evita. Como tal a opta e ora pa e Bijeenkomst. E reunion ta poni pa cuminsa 9’or di diamars mainta 5 di November proximo.  

E REUNION

E tema di reunion ta pa scucha Prome Minister Evelyn Wever-Croes riba su supuesto metemento den Ministerio Publico ora cu e lo a pidi informacion di un caso di ex director di DIP, pa na su turno e usa e info ey pa cu un medida disciplinario contra dje. Wever-Croes ta sigura cu tur cos a bay netchi y cu e lo defende su curpa manera mester ta. Oposicion sinembargo no ta guli e pilder ey y a exigi pa e splica sum es. Y cu lo tin un mocion di desconfiansa cla caba pa presenta contra e prome mandatario, cu intencion di bahe. Prome minister Wever a sigura cu e lo a wak e mocion aki traha caba, y a bisa cu e ta bin e reunion pa duna cara. Cu e cambio di e formato di reunion, parlamentarionan no por presenta un mocion pasobra esey no ta permiti den un reunion asina.