Aruba ta lidera e top 10 di paisnan cu mas refugiado per capita na mundo

NEW YORK – Mientras cu Turkia a duna proteccion na mas refugiado cu cualke otro pais den e último dies añanan, Aruba ta e pais number uno cu tin refugiado pa pais per capita. Asina e portal cu ta registra esaki, reliefweb.int ta raporta awe. Segun e portal, pa loke ta trata refugiadonan como un proporcion di e poblashon total, ta mayoria di paisnan chikito y menos conoci cu a acepta e cantidad di mas grandi di refugiado den e periodo aki. Aruba ta figura como number uno, sigui pa paisnan manera Corsou, Montenegro, Nauro, Armenia, Libanon, Colombia, Republica Checo, Moldavia, Estonia  durante e periodo 2014–2023.

1. ARUBA – 16.1 PORCIENTO DI E POBLACION TOTAL

Segun e raportahe, Aruba  como resultado di e crisis na e pais bisiña Venezuela, alrededor di 17.000 persona a busca refugio na Aruba. Hopi mas a purba di yega Aruba pero a wordo manda bek.

Aruba tin lasonan estrecho cu Hulanda, cu tambe ta controla su politica exterior y di siguridad. Pueblo di Aruba tin derecho di haya un paspoort Hulandes, y e autoridadnan tanto na Aruba como na Hulanda tin miedo cu esaki lo atrae un cantidad grandi di refugiado y migrante si nan no hiba un maneho di asilo estricto.

“Debi na e miedo di wordo deporta, como tambe e hecho cu solicitantenan di asilo registra na Aruba no mag di traha, mayoria refugiado y migrante ta biba scondi pa autoridadnan y ta gana nan pan den e parti informal di economia. Como resultado, ta difícil pa sa exactamente cuanto a huy bai e isla. E cifra di 17.000 ta e miho calkulacion di e instancia di refugiado di Nashonnan Uni. Potret NOS.