Awe ta ultimo dia pa MIA y UPP tambe yega 586 firma pa participa na eleccion

ORANJESTAD – Awe ta e ultimo dia cu partidonan politico cu den 2021 no a logra asiento den parlamento, por acumula e cantidad di 586 firma pa sigura nan participacion den e eleccion di dia 6 di december proximo. Di e 8 partidonan cu a cuminsa cu e jornada aki un siman pasa, a keda 2 partido. E partidonan politico Movemento Indigena Arubano (MIA) y  Union Patriotico Progresista (UPP) tin un dia mas (awe te 8:30pm) pa colecta 532 y 504 firma respectivamente, pa asina nan tambe por participa oficialmente na e eleccion parlamentario di dia 6 di December 2024. Nada no ta imposibel, pero di e patronchi cu ambos partido a experencia desde siman pasa dialuna, e ta mustra hopi improbable, cu nan logra esaki. Si esey ta e caso, e ora un total di 11 partido lo participa oficialmente na e proximo eleccion. 

E PROGRESO DI E PARTIDONAN TE AWOR

Manera ta conoci, e prome partidonan cu a logra nan cantidad tabata FUTURO y PPA, cu riba e prome dia caba, a yega 586 firma. Prome FUTURO, y despues PPA. A sigui partido LPR (Lucha pa Reforma) cu a logra esaki despues di 3 dia, sigui pa RED cu a logra ewaki den 4 dia. E siguiente dos partidonan a logra nan meta despues di 5 dia, cerando e prome siman, esta CURPA y despues tambe partido RED. Falta dos partido, MIA Y UPP, di cual UPP ta mas cerca, aunke cu e cantidad cu nan tin cu logra ta bastante, si mira e patronchi di firma cu nan a bin ta acumula. UPP a conoce un aumento relativo e ultimo dos dianan, pero ainda e cantidad ta sigui hopi. Partido MIA tambe falta basta. E lider di e partido ey a bisa cu cierto medio, incluyendo Noticiacla lo ta trociendo palabra di e partido, pa gana likes y followers, y cu nan lo sigui nan lucha internacionalmente. Noticiacla ta desea tur dos partido exito cu nan proceso pa logra nan meta.