Encuesta #2 di noticiacla: Aumento di costo di bida mester atencion di partidonan politico

ORANJESTAD – Segun e encuesta mas recien politico di Noticiacla, e mayoria kier sa di e partidonan politico con nan lo atende cu e problema di aumento di costo di bida (71%). Di e 14 scenarionan cu e encuesta ta provee, a pidi pa e lector scohe e 5 mas preocupante cu nan kier pa e partidonan atende cu nan. 

E CINCO PREOCUPACIONAN

Despues di esun menciona, e calidad di bida di nos grandinan ta sigui (46%) y e preocupacion cu corupcion y fraude ta afecta nos aparato gubernamental y esun semi gubernamental (44%). Finanzas publico y vivienda pagabel ta finalisa e lista di 5 na 42%. 

REMARCABLE

Loke tambe a hala atencion ta cu cierto tema cu tabata un tempo hopi trata den publicidad, no a haya mes hopi atencion den e encuesta aki. Entre nan, e tema di refineria cu tabata na e di penultimo lugar na 22%, y tambe proteccion di nos naturalesa for di destruccion causa pa turismo (27%). Pero e tema di pobresa tambe no a figura mucho halto (30%) y e parti di ilegalidad na Aruba cu tabata na 30% tambe. 

E TEMANAN

Con lo atende cu problema di aumento di costo di bida  

Cua paso lo tuma pa mehora calidad di bida di nos grandinan 

Con pa percura pa tanto den aparato publico (gobierno) y sector semi-publico preveni corupcion of fraude       

Con lo atende cu Finanzas publico 

Con lo percura pa vivienda pagabel pa ciudadanonan    

Kico lo haci cu Landspakket y Rijkswet pa supervision financiero   

Con lo atende cu e illegalnan na Aruba   

Kico lo haci pa introduci cuido médico preventivo    

Kico lo haci pa ataca pobresa na Aruba 

Ki plan lo tin pa baha e impacto di turismo riba nos infrastructura, nos medio-ambiente y nos accesibildad di nos local nan na luganan publico    

Kico lo haci pa proteha nos naturaleza di destruccion door di turismo     

Cua sector económico lo wordo stimula pa crece y con  

Kico lo haci cu e refineria

Ki maneho lo hiba pa promove mas participacion local den comercio