Solamente 700 alumno a paga aumento schoolgeld di 250 florin

ORANJESTAD – Apenas 700 alumno a paga nan schoolgeld ‘aumenta’ di 250 na Stichting Katholiek Onderwijs Aruba (SKOA). Esaki a keda presenta durante e caso cu e grupo di mayor preocupa a entama contra SKOA awe mainta. Cu e meta pa suspende e aumento di schoolgeld, y para exigencia nobo di inscripcion, e grupo di Mayor Preocupa a hiba SKOA corte awe mainta. Saliendo for di e punto di bista cu enseñansa mester ta pornada, y cu gobierno tin tur ley adapta, pero cu no ta ehecuta esaki, e grupo kier a mustra huez riba nan punto.

IMPASSE

Segun abogado Hose Figaroa, cu a bringa e caso pa e grupo di mayor, SKOA y gobierno tin un problema (impasse) pa motibo financiero, y e alumno y mayornan ta keda perhudica bou di esaki. A splica e aumento, e proceso y tambe e impasse entre e minister di enseñansa y SKOA. A para keto na e aumento, cu segun Figaroa, specifica pa segmento, ta resulta cu e schoolgeld mes, ta aumenta cu 700% (25 pa 175 florin di e 250 florin cu ta pidi di aumento).

AUMENTO

Ora cu a trece esaki dilanti, e abogado a señala na NoticiaCla.com, cu un total di apenas 700 di e 10.000 pico alumnonan cu ta cay bou SKOA, a paga e suma aumenta di 250 florin. Pues esei ta un grupo hopi chikito compara cu e totalidad. Pero no a bisa si, cuanto a paga despues cu a rebaha e suma te na 175.

BRUHA ASUNTO

Segun abogado di e grupo, SKOA ta bruhando e asunto di schoolgeld y ouderlijk bedrag cu tin cu wordo paga. Y esey no por ta e caso. Riba dje, usando e argumento di school gratis (subsidia pa gobierno) no mester ni paga ouderlijk bedrag tampoco.

ACUERDO INCOMPLETO

Y pa finalisa e argumento, a mustra cu enberdad SKOA y gobierno a ‘yega na un acuerdo’, pero esaki no ta completo. E acuerdo ta papia meramente di ‘suspende e aumento’ y cambia e cobransa parti den 2 aña, pero no ta para e cobransa ‘total’. Algo cu e abogadonan aki si kier logra, te ora cu tin claridad.

SKOA

E argumento di SKOA, cu no tabatin rechaso di alumno, si nan no por a paga, no tabatin base segun e abogado. E ta mustra cu e intencion di SKOA ta cu si un alumno no por paga, nan no ta rechase enseñansa, sino ta mande un otro scol. Esaki ta crea segracion di alumno y school, y ta haci como si fuera tin scol pa esnan cu ta paga, y scol pa esnan ‘mal pagado’. Algo cu den 2015 nos no por permiti na Aruba. Huez ta dicta sentencia 15 di juli proximo. NOTA: NoticiaCla.com no tabata presente den corte y no tin e version (ainda) di e partido contrario, esta SKOA.