‘Management team’ cuerpo di aduana a instala

ORANJESTAD -Despues cu finalmente Cuerpo di Aduana a logra muda pa un edificio temporal nobo, cuerpo di duana a ricibi bishita di minister Bermudez na e oficina central aki situa awor na “Budlex Building” pa asina conoce e edificio, comparti un rato cu demas colega y tambe conoce e ekipo di maneho cu a wordo instala pa asisti director di Aduana, esta Sr. mr. Roderick “Ricky” Croes den su maneho. Croes a cuminsa su funcion oficial recientemente na cabes di e management team. 

MUDANSA

Segun e Director Croes tur cambio ta tuma su tempo pa adapta na dje sin embargo den e caso di Cuerpo di Aduana e mudansa pa e edificio nobo a trece hopi union den e cuerpo como tambe hopi motivacion pa cu e trabou. “Tur colega ta entusiasma y nan a cuminsa mira e desaroyonan cu ta tumando luga pa mehora y motiva nos den nos trabou”, asina Sr. Croes a remarca. Cu e mudansa aki tambe a instala un ekipo di maneho cu ta duna sosten na e director y cu ta facilita e proceso di cambio y actualisacionnan cu mester tuma luga ainda den henter e organisacion duanero. Na mes momento tambe e mandatario di finanzas a comparti tur e ultimo desaroyonan pa loke ta trata e departamento riba su mes como tambe e plannan pa futuro.