15 miyon mericano ya a deposita nan voto trempan pa eleccion presidencial

NEW YORK Dos siman prome cu e eleccionnan presidencial Mericano, 15 miyon di voto a wordo deposita caba. The New York Times ta informa cu varios estado a informa un partisipacion record riba e prome dia di votacion anticipa.

E partisipacion nunca no tabata asina halto na entre otro Louisiana y e estado swing North Carolina. Na Georgia, un otro estado importante di swing, un record diario ta wordo kibra casi tur dia y mas cu 1.5 miyon hende a deposita nan voto caba.

Entre nan tin ex-presidente Jimmy Carter di 100 aña di edad. Su famia a anuncia riba su fecha natal, 1 di october, cu e estadista di edad avansa a pensa cu vota pa Harris tabata mas importante cu yega 100 aña. Su votashon postal a sali dia 16 di october, un dia despues cu e urnanan di votashon a habri.