Introduccion parkeermeter cu otro retraso di 2 luna

ORANJESTAD – E parkeermeters lo core un retraso atrobe di por lo menos dos luna y mei, prome cu nan por funciona. E ley di parkeermeter porfin a yega parlamento, pero no por wordo trata ainda. E ta fecha 23 di juni cu e la drenta parlamento, pero segun vice presidente di parlamento Chris Dammers a confirma na NoticiaCla.com awe mainta, no tin fecha pa trate. Mas probable lo trata esaki despues di reces, cu ta inifica mitar pa fin di augustus. Tanten, e parkeermeters no por funciona.

CONTENIDO

E ley ta ensera un serie di asunto cu tin cu wordo regla, variando di entre otro stipulacion di asina yama ‘parkeervakken’, meter mes, e permiso pa e compania por opera, permiso pa duna multa, pone klem na auto, y confisca auto despues. Tambe ta duna e parkeerwachter e permiso pa actua. Tur esaki mester wordo regla pa medio di e ley di por lo menos 11 pagina, prome cu por pensa di introduce esaki.

MULTA

Algun punto cu ta resalta, ta e multa cu un hende ta haya si nan ‘viola’ e ley, esta si nan no cumpli cu pago pa e espacio cu nan a parker. E suma stipula segun e ley, ta 75 florin. E ta duna e parkeerwachter e permiso e ora, fuera di cobra e multa, pa pone e auto riba un ‘klem’ pa e periodo di dos ora. Despues di e dos oranan, e takelwagen tin permiso pa takel e auto en cuestion. No ta conoci cuanto e persona tin cu paga si a takel e auto. E placa cu recauda, tanto di e meter usa, como multa, ta bay pa e compania cu tin e consesion, esta esun cu ta cay bou di Arubus.

INSTALACION

Manera NoticiaCla.com a raporta recientemente, Arubus a cuminsa instala e spotnan di parkeermeter, y a opta pa usa e caya Wilhelminastraat bay ariba, pa e prome 25. Unabes caba cu esey, nan lo sigui cu e proximo 25. Pero ta trata solamente di e base nan y no e meternan mes. Esey lo bin unabes cu e ley keda cla. No ta conoci cuanto base a pone caba, Pero ta comienso di mei a cuminsa. Mientras cu e ley no pasa, nan lo sigui pone e basenan, y inicia nan campaña di concientisacion y informacion. Lesa e contenido di e ley aki.