Total di 700 peticion pa prestamo pa estudio haci

ORANJESTAD – E aña aki un total di 700 peticion pa prestamo a wordo haci pa estudio. Mes momento minister di Enseñansa Michelle Hooyboer-Winklaar diaranson a anuncia cu studiantenan cu ta bay cu un ‘Arubalening’ pa Hulanda lo biaha den tres grupo. E fechanan ta 1, 2 y 4 di augustus proximo. Pero e cantidad no ta conoci obviamente mirando cu tin resultadonan cu tin cu drenta ainda di studiantenan cu a caba haci nan her examen.

CAMBIO POSITIVO

Ademas tin cambionan positivo den e acceso di informacion pa cu e trayectorio y procesonan cu tin di haci cu Arubalening. E cambionan introduci ta refleha e necesidad pa innovacion y modernisacion di e sistema pa asina facilita e studiantenan y nan mayornan cu informacion na un forma mas eficiente y cu ta pas tambe den bida diario di e hobennan.

WEBSITE

Tur detaye encuanto di Arubalening ta disponibel riba e website www.ea.aw, unda cu bao di e categoria “Arubalening” lo tin tur documento necesario y tambe tur e ultimo noticianan tocante di e prestamo. Esaki ta un parti di e proceso cu ta canando pa optimalisa e servicio pa cu e studiante y su mayornan; como parti di un trayectorio nobo cu e division encarga ta pasando aden, el a agrega. Cierto cambionan pa cu e componentenan di e prestamo tambe a wordo introduci, cual ta valido for di e aña academico 2015/2016. E cambionan aki, cu ta concerni topiconan manera “startpakket” y “termijn uitbetalingen” y kico e opcionnan pa combina e dos componentenan aki ta, tambe ta describi riba e website.

MBO na EPI

A menciona cu por ehempel un studiante cu a pidi un prestamo pa sigui un Bachelor program of MBO na EPI na Aruba tin e opcion pa ricibi e startpakket plus termijn uitbetalingen of por scoge pa e startpakket so. Tambe tin diferente descripcion di otro situacionnan unda ta considera por ehempel si e studiante tin un prestamo anterior, si e studiante despues di un aña di estudio na Corsou ta desea pa sigui studia na Hulanda, etc. A bisa cu tambe Land Aruba ta brinda prestamo na studiantenan cu kier studia pa nan Master’s Degree, pero por ehempel mester sa cu esaki ta consisti di un solo componente, esta e termijn uitbetalingen. E departamento a scoge pa uza tres componente pa comparti informacion cu studiantenan, esta www.ea.aw Facebook y videonan tocante di informacionnan relevante y importante. Celina Oduber a anuncia cu tur studiante cu a gradua y ta bay sigui studia cu un Arubalening mester completa e procedura di prestamo y pa e proposito aki a pone tur contract riba www.ea.aw y e studiante por download, print, yena y firma esaki. Tur rekisito tambe ta disponibel riba website.

FECHA PA INFORMACION

For di dia 29 di juni, 2015 te cu dia 10 di juli, 2015 tur studiante por acudi na e balie di Studiefaciliteiten- en begeleiding di Departamento di Enseñansa cu e siguiente pakete: e contract yena y firma, un copia “gewaarmerkt” di nan diploma y un copia di nan “bank ID”. Na e balie lo wak si e pakete ta completo y lo acepta esaki. Si e pakete no ta completo e no ta wordo acepta. E departamento lo keda habri mas laat riba dianan 6 y 7 di juli pa atende cu personanan cu no ta alcansa bay den oranan di oficina y esunnan cu tin mas pregunta of mester di asistencia pa yena e contract. E orario di apertura lo wordo anuncia riba e website di Departamento di Enseñansa.