Kan: AGF contento di a keda cla cu compra di Radisson Hotel

ORANJESTAD – “Nos ta hopi contento di a firma porfin” tabata e prome palabranan di e socio director di Aruba Growth Fund (AGF) Rene Kan, diaranson atardi den su prome declaracion exclusivo pa NoticiaCla.com despues di a firma e documento cu ta seya e compra di e hotel. “Nos ta hopi agradecido tambe na minister (di Turismo) Otmar Oduber cu a haci hopi esfuerso ultimo simannan pa logra e deal aki” Kan a sigui bisa Noticiala.com. E la confirma asina cu e intermediacion di e mandatario tabata cardinal pa logro di e deal di awe. Cu e firmamento di awe, ta yega un fin na e proceso y tur hende por hala rosea trankil, cu e hotel no ta bira un all inclusive.

DETAYENAN

Segun Kan, awe tardi 5’or e tres partidonan AGF, Carlson Group y RIU a firma e acuerdo, mientras cu e traspaso official mes, lo tuma lugar dia 15 di juli proximo. Mes momento e la confirma tambe cu e placa di e compra, tambe a pasa caba pa Carlson Group, aunke e no kier a divulga e suma cu a paga den e deal aki. RIU tabata parti di e proceso di firmamento, como cu nan tabata esnan cu inicialmente a firma pa compra di e hotel caba. Y consecuentemente esey mester a wordo cambia. RIU a hala atras despues cu e caso inicial a tuma lugar, pa asina AGF y Carlson Group por a continua atrobe cu nan negosashon. Den esaki, segun Kan, e no por a caba subraya con instrumental con importante e intermediacion di Oduber tabata pa logra convence RIU y Carlson Group pa back off di e deal y laga AGF sinta bek na mesa. “E ta algo cu sigur nos como Aruba Growth Fund ta aprecia masha hopi mes” Kan a sigui bisa. Na final di dia tambe, AGF, Carlson Group y gobierno a pidi corte y e  huez cu a trata e caso inicial, pa revoca e caso cu AGF y gobierno a cuminsa, oficialmente, mirando cu partidonan a haya otro. 

OPERACION

Unabez cu e traspaso tuma lugar dia 15 di juli, e hotel ta bira propiedad di AGF, y cu esey, ta haya e derecho pa cambia e nomber pa Hilton Aruba Caribbean Resort & Casino. Manera Kan a splica den pasado, tabata importante pa nan, pa e nomber Aruba Caribbean keda aden ya cu e ta un parti importante di nos historia. Mas aun cu ta un compania local ta bira doño di un di Aruba su prome hotelnan riba e Palm Beach strip. Tambe Kan a confirma cu na 2016 nan lo cuminsa cu renobacion di e hotel, pa asina e haya e bachi conoci na nivel di e cadena Hilton.

RASON

Cu esaki, NoticiaCla.com ta haya rason di e informacion di awe mainta cu a bisa cu tabatin un acuerdo entre Aruba Growth Fund y Carlson Group pa compra di Radisson Hotel. Tur loke cu mester a sosode tabata pa finalisa e ‘formalidadnan’. Esaki ta loke NoticiaCla.com a compronde di su fuentenan ayera nochi pa awe mainta cu a confirma e informacion. NoticiaCla.com a tuma contacto cu AGF, pero a wordo bisa cu nan ‘no por duna comentario aworaki’. Di parti fuentenan rond di Carlson Group, NoticiaCla.com a compronde cu e ‘negosacionan ta bayendo bon y ta spera na yega na otro pronto’. Mes momento NoticiaCla.com por confirma cu riba peticion di partidonan, huez a bolbe postpone e sentencia pa un siman mas.

SITUACION TE CU AYERA

Siman a habri cu e informacion cu tur cos tabata mustra cu cosnan tabata bayendo bon cu e negosacionan final entre Aruba Growth Fund (AFG) y Carlson Group, pa por sera un deal pa compra di Radisson hotel. For di e informacion cu NoticiaCla.com tabatin, pa mas tarda diamars anochi mester tabatin un deal, sino huez lo mester a dicta un setencia diaranson mainta. Tabatin e chens cu por a pidi un extencion na huez pa duna mas tempo si no keda cla, y tin e chens cu partidonan  haya otro diamars mes. E ora lo a bisa huez cu no mester un veredicto, ya cu nan a keda cla.

E SITUACION SIMAN PASA

Den anticipacion di un acuerdo entre partidonan den disputa esta Aruba Growth Fund (AGF) y Carlson Group, huez Noordhuizen a opta diaranson mainta siman pasa, pa duna oido na peticion di e partidonan y no dicta sentencia riba e caso aki. Huez a opta pa wanta e vonnis te diaranson awor esta dia 24 di juni. “Si yega na un acuerdo, e caso lo wordo ingetrokken door di AGF”, abogado di Carlson Group, Doris Canwood a confirma na NoticiaCla.com siman pasa diaranson.

MOTIBO DI CAMBIO

E motibo di e cambio ta cu (manera cu nos a raporta prome) tin negoshacionnan andando entre Carlson Group y AGF (cu permiso di RIU segun abogado Canwood). “Tin un acuerdo (no firma) riba puntonan di principio pero ainda mester yega na un asignacion di e contract di RIU na AGF” e abogado a sigui bisa. Y pesey, a wanta e vonnis. Tanten, partidonan ta sigui negosha. A compronde tambe cu placa mester wordo paga den e periodo aki, pa garantisa e deal prome cu otro siman diaranson.

PETICION PA WANTA VEREDICTO

Tabata siman pasa diamars mainta cu minister di turismo Otmar Oduber a confirma e noticia di NoticiaCla.com di un posibel acuerdo entre Aruba Growth Fund (AGF) y Carlson Group y cu por laga e deal cu RIU hotel afo. E mandatario a confirma e informacion cu partidonan a haya otro siman pasa dialuna. Entre tanto e intencion tabata pa pidi huez pa wanta e decision di awe riba e caso cu AGF a lanta contra Carlson Group. 

CASO CORTE

Manera ta conoci, AGF luna pasa a hiba Carlson Group corte pa para e deal cu nan lo a sera cu RIU pa compra di e hotel. A resultado cu mientras cu AGF tabata negosha pa 8 luna cu Carlson Group, tras di su lomba, e ultimo aki tabata negosha cu RIU hotel y cu den apenas 8 dia a sera un deal, lagando AGF afor. Durante 2 ora largo e dos partidonan aki a debati dilanti huez, pa finalmente huez pone e fecha di mayan mainta pa dicta un sentencia riba e caso aki. Un sentencia cu por tin su repercucion pa e plan di gobierno riba su maneho di all inclusive.

TRAS DI CORTINA

Mientrastanto partidonan no a para keto y tras di cortina a sigui papia y awor parse cu ta asina lew cu partidonan lo ta yegando serca y cu algun documento falta pa wordo intercambia pa e deal entre AGF y Carlson Group keda seya.