Ceddanne Rafaela sorpresivamente no ta nominá pa wante di oro

NEW YORK.- Ayera beisbòl Liga Grandi a presentá e nominadonan pa wante di oro pa tantu Liga Nashonal i tambe Liga Merikano. Esaki unda ta premia e hungadónan ku mas a destaká defensivamente e temporada tras di lomba. Ceddanne Rafaela sorpresivamente no ta entre hungadónan nominá.

Ceddanne e temporada tras di lomba a fungi komo un “utility” pa Boston Red Sox. El a hunga segunda base, tersera base, shortstop i tambe den centerfield pa Red Sox.

Huntu ku esaki e yu di Kòrsou a bira e promé hungadó for di 1901, pa hunga por lo ménos 60 wega tantu komo shortstop i tambe den centerfield den un temporada.

No opstante esaki Ceddanne no ta nominá pa wante di oro komo “utility” den Liga Merikano.

Mauricio Dubόn (Astros), Willi Castro (Twins) i Dylan Moore ( Mariners) ta e tres hungadónan ku a keda nominá, pa wante di oro  komo “utility” den Liga Merikano.

Ora bai profundisá den algun sifra defensivo, Ceddanne Rafaela ta figurá mas mihó ku algun di e nominadonan. Den e kaso aki hasiendo uso di e DRS( Defensive Runs Saved) i tambe OAA ( Outs Above Average).

DRS ta un kalkulashon ku ta trese pa dilanti, kuantu kareda un hungadó a skapa ku su aktuashon defensivo.

Miéntras Outs Above Average ta un midi defensivo den kua ta kapturá e impakto defensivo di un hungadó, dor di kuantifiká e kantidat di out ku el a kontribuí na dje kompará ku un hungadó promedio.

Ceddanne tin 10 DRS i -2 OAA e temporada aki. Dubόn tin 6 DRS i 10 OAA, Castro -18 DRS i 0 OAA miéntras Moore tin -4 DRS i -1 OAA.

Ceddanne ta hopi mas mihó den DRS i djis un tiki tras den OAA, kompará ku dos nominado pa wante di oro pa “utility” den Liga Merikano. NOTA: Texto ta scirbi den Papiamento fonetico di Corsou.