AVB: Final di futbol ta entre SV R.C.A y SV Estrella

ORANJESTAD - Aruba Voetbal Bond a anuncia awe cu den nan decision, Comision di Apelacion ta duna e ekipo di futbol di honor S.V. Britannia rason y ta anula ambos decision tuma pa AVB. Y den caso di S.V. R.C.A. ta duna nan tambe rason y ta anula e decision di AVB. E comision di apelacion di Arubaanse Voetbal Bond a tuma un decision ayera dia 23 di juni 2015, relaciona cu e dos casonan cu e ekipo di S.V. Britannia a inicia contra AVB y e caso cu S.V. R.C.A. a inicia tambe contra AVB. Consecuentemente, e wega hunga entre Britannia y RCA ta legal y e resultado 2-0 na fabor di RCA ta keda vigente!

ULTIMO WEGA

Cu e realidad aki riba mesa, awor AVB lo organisa e ultimo wega pendiente pa hunga ainda den e campeonato 2014-2015. E wega pa campeon lo ta entre S.V. R.C.A. y S.V. Estrella. Un fecha exacto no ta fiha ainda.

COMISION APELACION

E comision di apelacion di AVB ta forma pa mr. Rolando "Ronnie" Bernadina como Presidente, Luciano Croes como secretario y cu miembronan mr. Vito Carlo, mr. Ellen Kuster, mr. Rossi Marchena, mr. Eugene Martis y Benedicto de Cuba. Di e 7 miembronan, 5 ta hurista di cual 4 ta abogadonan activo.

TRANSPARENCIA

Den cuadro di transparencia, AVB ta respeta e decision tuma pa Comision di Apelacion, considera e organo mas halto na momento di un disputa. AVB lo tin cu cubri e gastonan di tratamento di e casonan, balora na Afl. 2250 pa tur tres caso.

DESICIONAN

Basicamente, e Comision di Apelacion a conclui cu e decisionnan tuma pa directiva di AVB no tabata corecto. Den e apelacion di S.V. R.C.A. a anula e decision di AVB, ta kita tur castigo y multa impone riba e ekipo y contra e hungado Alex Hassell. Den e caso di S.V. Britannia pa e hungado Marvin Hous, a dicidi di anula e decision di AVB, declara e hungado legal y kita tur castigo y multa impone contra e ekipo y e hungado. Den e caso di S.V. Britannia relaciona cu e hungado Alex Hassell, a dicidi di anula e decision di AVB, ta declara e hungado legal pa a participa den e wega hunga entre Britannia y RCA.