Geoffrey Wever a crea un situacion inusual, kedando minister di un partido, mientras ta integra den otro partido

ORANJESTAD – Cu e entrada den e partido politico nobo FUTURO, Geoffrey Wever ta presenta un situacion hopi inusual, particular y hopi ta considera esaki tambe te hasta no etico. Esta cu e ta keda como minister pa partido RAIZ, aunke cu e la anuncai su retiro di e partido ey, y a uni oficialmente cu un partido nobo, den e caso aki, FUTURO. MIentras cu den seno di FUTURO, e ta wordo elogia y apoya, pafo, tin basta critica cu esaki ta un paso hopi straño, inusual y politicamente no etico.

ETICO OF NO

Noticiacla a lansa como prome pregunta na Wever, cu si awor cu Wever ta oficialmente forma parti di e partido FUTURO, si e ta keda ainda como minister pa RAIZ of e ta retira. Y cu si e ta keda, si e no ta considera esaki como algo no etico. Wever a purba contesta den un forma politicamente ‘corecto’, comparando esaki cu un proceso di un compania, unda cu ora cu trahado retira, e ta haya dos luna di ‘opzegtermijn’ prome cu e bandona e trabou. Y cu de hecho, e ta un minister demisionario, no ta haciendo nada nobo, alegando como si fuera cu e ta un minister pa nomber y no tin cu haci casi nada mas e proximo dos lunanan cu e ta sinta como minister, pues cu e no ta wak e problema.

SOSTEN DI PARLAMENTARIONAN DI RAIZAdemas, segun Wever, mientras cu e dos parlamentarionan di partido RAIZ, Misha Raymond y Raymond Kamperveen sostene e posicion ey, e por keda como minister. Si nan pensa diferente, e ora e lo baha. Ademas, prome minister Evelyn Wever tambe a bisa cu e no tin problema pa Wever keda den conseho di Minister, hasta como RAIZ, siendo cu e ta riba un otro partido. Segun Wever-Croes, ta e dos parlamentarionan di RAIZ ta dicidi riba esey. E la puntra nan pa nan pensamento, pero te cu diasabra mainta, e no a haya e contesta ey ainda. 

RAIZ TA OK

Recientemente anticipando e situacion aki, Noticiacla a puntra lider di RAIZ Ursell Arends cu si partido RAIZ lo permiti Geofrrey subi riba un otro lista politico, mientras cu e ta keda minister pa RAIZ te ora cu e termino di gobierno actual caba. Riba esaki, Arends a contesta “Yes, esey ta locual nos a palabra cu otro. Nos mester garantisa cu pais Aruba ta keda gobernabel”.

DISGUSTA

Mientrastanto, riba rednan social, y particularmente riba e comentarionan riba Noticiacla, critica tabata mixto, entre un grupo di persona cu a sigura di lo sostene Wever su cambio, pero mes momento un grupo mas grandi, tabata cuestiona e paso aki, considerando esaki como no etico. Bo no por ta riba un partido, coriendo campaña, y ta ainda representa minister di un otro partido, cu de facto bo a retira di dje un siman prome. No ta solamente Wever a haya e critica aki, sino tambe e partido RAIZ y su lider, pa a permiti e situacion inusual aki esta di ‘sirbi dos Dios’ politicamente.