Glenbert Croes ta tuma distancia di politica y concentra riba salud y famia

ORANJESTAD – Tur cos ta mustra cu e carera politico di Glenbert Croes  definitivamente a yega na un final. Diabierna, pa medio di su abogadonan, nan a confirma cu su persona, despues di a retira como minister manera ley ta stipula, alabez lo retira y tuma distancia di politica. “Pa awor Croes kier concentra riba su salud y su famia”.

SUSPENSION DI DETENCION

E team di defensa di Glenbert Croes a confirma tambe cu awe mainta 11:00am e suspension di su detencion a drenta na vigor.

“Tanto e team di defensa como Ministerio Publico a solicita e suspension di su detencion. Huez Comisario a honra e peticion aki bou algun condicion. Croes a confirma cu lo cumpli cu e condicionnan stipula pa Huez Comisario”.

ACUSACIONAN 

Pa loke ta trata e caso mes, e abogadonan a divulga (un biaha mas) cu ta trata dos cargo/acusacion. 1: soborno, 2: mal uzo di funcion. “Croes ta confirma su inocencia contra e dos sospechonan den su contra y lo bay dedica tempo na su defensa pa comproba esaki”.